फडणवीसांना थेट ललकारलं! ३ महिने जेलमध्ये टाकलं तरी पुन्हा येईन; ‘कॉक्रोच जनता पार्टी’चा मुख्य निवडणूक आयुक्तांविरोधात एल्गार, दादरमध्ये उद्या ठिय्या

विशेष प्रतिनिधी / मुंबई

मुख्य निवडणूक आयुक्त ज्ञानेश कुमार यांच्या राजीनाम्याच्या मागणीसाठी ‘कॉक्रोच जनता पार्टी’ने आक्रमक भूमिका घेतली असून पक्षाचे संस्थापक अभिजीत दिपके यांनी थेट मुख्यमंत्री देवेंद्र फडणवीस यांना जशास तसे उत्तर दिले आहे. “मुख्यमंत्र्यांनी धमक्या देणे सोडून द्यावे, तुम्ही तीन महिने आत टाकले तरी ज्ञानेश कुमारांच्या राजीनाम्यासाठी आम्ही ‘पुन्हा येऊ, पुन्हा येऊ, पुन्हा येऊ’!” असे थेट आव्हान दिपके यांनी मुंबई प्रेस क्लब येथील पत्रकार परिषदेत दिले.

केंद्रीय निवडणूक आयोगातील दोन निवडणूक आयुक्तांनीच ज्ञानेश कुमार यांच्या मनमानी कारभारावर ठपका ठेवल्याने देशभरात संतापाची लाट पसरली आहे. या पार्श्वभूमीवर कॉक्रोच जनता पार्टीच्या वतीने शुक्रवारी, २ ऑक्टोबर रोजी दादर येथील ऐतिहासिक छत्रपती शिवाजी महाराज पार्क (गेट क्र. ६) येथून संध्याकाळी ४ वाजता शांततापूर्ण आंदोलनाची सुरुवात होणार आहे. या पत्रकार परिषदेला पक्षाचे राष्ट्रीय संघटक अजिंक्य शिंदे, राष्ट्रीय प्रवक्त्या मेहेर, राष्ट्रीय सचिव आफरीन आणि मुंबई समन्वयक प्रणय उपस्थित होते. आंदोलकांनी राष्ट्रध्वज आणि महात्मा गांधींचे चित्र असलेले टी-शर्ट परिधान करून सहभागी व्हावे, असे आवाहन करण्यात आले आहे.

या आंदोलनाच्या माध्यमातून अभिजीत दिपके यांनी तीन प्रमुख मागण्या लावून धरल्या आहेत. मुख्य निवडणूक आयुक्त ज्ञानेश कुमार यांचा तत्काळ राजीनामा घेऊन त्यांच्या गैरकारभाराची क्रिमिनल चौकशी व्हावी, ही पहिली मागणी आहे. मतदार पडताळणीच्या नावाखाली २०२४ पासून तब्बल १३ कोटी मतदारांची नावे संशयास्पद पद्धतीने वगळण्यात आल्याचा गंभीर आरोप करत चालू ‘एसआयआर’ (SIR) मोहीम तातडीने थांबवून २००५/२०२५ च्या मूळ मतदार यादीनुसारच पुढील निवडणुका घ्याव्यात, ही दुसरी मागणी करण्यात आली आहे. तसेच निवडणूक आयुक्तांची निवड केवळ पंतप्रधान आणि गृहमंत्र्यांच्या मर्जीने न होता, सर्वोच्च न्यायालयाच्या मूळ निकालानुसार निवड समितीत देशाचे सरन्यायाधीश आणि नागरी समाजाचा सहभाग असावा, अशी तिसरी मागणी त्यांनी मांडली.

दादरमधील आंदोलनानंतर ऑक्टोबरच्या अखेरीस दिल्लीतील जंतर-मंतर येथे तीव्र निदर्शने केली जातील, असेही दिपके यांनी स्पष्ट केले. “शिवाजी पार्कवर देवेंद्र फडणवीस रॅली करू शकतात, तर मग आम्ही तिथे आंदोलन का करू शकत नाही?” असा सवाल त्यांनी उपस्थित केला. तसेच मुंबई पोलिसांकडून अटक होण्याची शक्यता वर्तवताना, “तीन दिवस काय, तीन महिने जेलमध्ये ठेवले तरी मी पुन्हा रस्त्यावर येईन,” असा इशारा देत ज्ञानेश कुमार यांचा राजीनामा होईपर्यंत आंदोलन सुरूच राहील, असा निर्धार त्यांनी व्यक्त केला.