भल्या पहाटेच्या कारवाईत उत्तर जिल्हाप्रमुख मौलानाला पोलिसांनी घेतले ताब्यात
महाराष्ट्र संवाद न्यूज नेटवर्क
दहशतवादी संघटनांशी निगडीत असलेल्या पॉप्युलर फ्रंन्ट ऑफ इंडिया ‘पीएफआय’ या संघटनेच्या कार्यकर्त्यांचे धागेदोरे आता संगमनेरपर्यत येऊन पोहचले आहेत. या संघटनेशी निगडीत असल्याच्या कारणावरुन नगर जिल्ह्यात दोघांना ताब्यात घेण्यात आले असून यात संगमनेरमधील एका मौलानाचा समावेश आहे. मंगळवारी भल्या पहाटे स्थानिक पोलिसांनी केलेल्या या कारवाईत केंद्रीय तपास यंत्रणादेखील कार्यरत होती.
संगमनेर शहरालगतच्या संगमनेर खुर्द येथे आणि नगर शहरात ही कारवाई करण्यात आली. नगरमधून या संघटनेशी निगडीत असलेल्या विभागीय अध्यक्षाला तर संगमनेर खुर्द येथून उत्तर जिल्हाप्रमुख असलेल्या एका मौलानाला ताब्यात घेण्यात आले. या दोघांविरोधात सुरु असलेल्या कारवाईबद्दल गोपनीयता बाळगली जात असून त्यांच्यावर प्रतिबंधात्मक कारवाई केली जात असल्याची माहिती देण्यात आली.
पहाटेच्या दरम्यान संगमनेर खुर्दमध्ये करण्यात आलेल्या या कारवाईत पोलीस उपअधीक्षक राहुल मदने यांच्या नेतृत्वाखाली त्यांच्या कार्यालयात कार्यरत असलेल्या पथकाचा समावेश होता. या कारवाईत पीएफआय या इस्लामी सोबत कार्यरत असलेल्या मौलानाला ताब्यात घेण्यात आले. मौलानाविरोधात संगमनेर पोलिसांनी १५१(३) प्रमाणे प्रतिबंधात्मक कारवाई केली आहे.
पीएफआय (PFI) या इस्लामी संघटनेविरोधात देशभर कारवाई सुरु असून आत्तापर्यत याचे धागेदोरे नगर जिल्ह्यापर्यत पोहोचले नव्हते. केंद्रीय तपास यंत्रणांनी राज्यात पुणे, बीड, अमरावती, औरंगाबाद, नाशिक आदी जिल्ह्यात संघटनेच्या कार्यालयांवर व निगडीत असलेल्यांवर छापेमारी करुन अनेकांना अटक केली आहे. आता नगर शहरासोबतच संगमनेरमध्येदेखील या संघटनेचे धागेदोरे आढळून आल्याच्या कारणावरुन ही छापेमारी करण्यात आली. संघटनेत कार्यरत असलेल्या लोकांवर तपास यंत्रणेचे बारीक लक्ष आहे.
