अध्यक्ष बाबा ओहोळ यांचे प्रतिपादन
आमदार थोरात यांच्या नेतृत्वाखाली विकासाची वाटचाल
महाराष्ट्र संवाद न्यूज नेटवर्क
थोरात कारखाना ही तालुक्याची कामधेनु आहे. सहकाराबरोबर ग्रामीण विकास व आर्थिक चक्र तालुक्यात फिरत आहे. ही संगमनेरात विकासाची संस्कृती आहे. काँग्रेस नेते माजी मंत्री आमदार बाळासाहेब थोरात यांच्या नेतृत्वाखाली तालुका सर्व क्षेत्रात अग्रगण्य आहे. यावर्षी सर्वत्र चांगला पाऊस झाला, त्यामुळे कार्यक्षेत्रात जास्तीत जास्त ऊसाची लागवड करावी. असे प्रतिपादन सहकार महर्षी भाऊसाहेब थोरात सहकारी साखर कारखान्याचे अध्यक्ष बाबा ओहोळ यांनी केले.
सहकारमहर्षी भाऊसाहेब थोरात सहकारी साखर कारखान्याचा सन 2022 – 2023 या गळित हंगामाच्या बॉयलर अग्निप्रदिपन समारंभावेळी ते बोलत होते. यावेळी व्यासपीठावर कांचनताई थोरात, दुर्गाताई तांबे, लक्ष्मण कुटे, इंद्रजित थोरात, संतोष हासे, आरती थोरात,अमित पंडित, गणपतराव सांगळे, माधव हासे, अजय फटांगरे, आर. एम. कातोरे, कार्यकारी संचालक जगन्नाथ घुगरकर आदी उपस्थित होते.
ओहोळ म्हणाले, सहकारमहर्षी भाऊसाहेब थोरात यांनी घालून दिलेल्या आदर्श तत्वावर कारखान्याची वाटचाल सुरु आहे. त्याचबरोबर माजी महसूलमंत्री आमदार बाळासाहेब थोरात यांच्या नेतृत्वाखाली सहकारासह तालुक्यात सातत्यपूर्ण विकास सुरु आहे. ऊस हे शास्वत पिक असल्याने शेतकऱ्यांनी जास्तीत जास्त ऊसाची लागवड करावी असे आवाहन त्यांनी केले.
कांचनताई थोरात म्हणाल्या, सहकारमहर्षी भाऊसाहेब थोरात यांचे नाव असलेला कारखाना आमदार बाळासाहेब थोरात यांच्या मार्गदर्शनाखाली सहकारात कायम लौकिकास्पद राहिला असून या कारखान्याने तालुक्याच्या विकासात मोठे योगदान दिले आहे.
प्रास्तविकात कार्यकारी संचालक घुगरकर म्हणाले, यावर्षी सर्वत्र चांगला पाऊस आहे. कार्यक्षेत्रात सुमारे 6 लाख मेट्रीक टन ऊसाची निर्मिती होणार आहे. तर बाहेरील ऊस उत्पादकांचा आपल्या कारखान्यावर विश्वास असल्याने बाहेरील ऊस आणून 13 लाख टन ऊस गाळपाचे उदिष्ट कारखान्याने ठेवले आहे. कारखान्याचे सर्व ओव्हर ऑईलींगचे काम पुर्ण होत असून 10 ऑक्टोबरपासून कारखाना सुरु करण्याचे उदिष्ट आहे.
“कारखान्याचे संचालक इंद्रजित थोरात व त्यांच्या पत्नी आरतीताई यांच्या हस्ते बॉयलर अग्निप्रदिपन करण्यात आले. तर कारखान्याचे उपाध्यक्ष संतोष हासे व त्यांच्या पत्नी मनिषा, रमेश गुंजाळ व त्यांच्या पत्नी ममता, इंद्रजित खेमनर व त्यांच्या पत्नी सोनाली खेमनर, विनोद हासे व त्यांच्या पत्नी वैशाली हासे, अनिल काळे व त्यांच्या पत्नी लता यांच्या हस्ते विधीवत पुजा करण्यात आली”.
