महाराष्ट्र संवाद न्यूज नेटवर्क
केंद्र सरकारच्या स्वच्छ सर्वेक्षण अभियानात संगमनेर नगर परिषदेने पश्चिम विभागात देशात तिसरा क्रमांक मिळविला आहे. तसेच कचरा मुक्त शहराअंतर्गत थ्री स्टारचे मानांकन देखील पालिकेत प्राप्त झाल्याची माहिती प्रशासक तथा प्रांताधिकारी डॉ. शशिकांत मंगरूळे आणि मुख्याधिकारी राहुल वाघ दिली.
2022 मध्ये झालेल्या या स्पर्धेचे मानांकन नुकतेच जाहीर करण्यात आले असून संगमनेर नगर परिषदेने पुन्हा एकदा नेत्रदीपक कामगिरी केली आहे. तत्कालीन नगराध्यक्ष दुर्गाताई तांबे यांनी या अभियानात मोठी मेहनत घेत संगमनेर कचरा मुक्त करण्यात आणि या माध्यमातून सर्वांच्या सहकार्याने पालिकेला कोट्यावधी रुपये बक्षीस मिळून देण्याचे काम केले होते. आता प्रशासकीय कालावधीत देखील हाच पायंडा कायम राहिला आहे.
केंद्र शासनाच्यावतीने देश पातळीवर सर्व राज्यातील नगर परिषदांसाठी स्वच्छ सर्वेक्षण २०२२अभियान राबविण्यात आले. शासनाच्या या स्पर्धात्मक उपक्रमात संगमनेर नगर परिषदेने सहभागी होऊन स्वच्छतेबाबत उत्कृष्ट कामगिरी करतांना कचरामुक्त शहर अंतर्गत थ्री स्टार, हागणदारीमुक्त शहरांतर्गत ओडीएफ ++ तसेच स्वच्छ सर्वेक्षण अंतर्गत देश पातळीवर पश्चिम विभागात तिसऱ्या क्रमांकाचे मानांकन प्राप्त केले.
स्वच्छ सर्वेक्षण स्पर्धेत शहरातील नागरिक, विविध शैक्षणिक, सामाजिक संस्था यांनी उत्स्फूर्त सहभाग नोंदवून मोलाचे सहकार्य केले. याबद्दल संगमनेर शहरवासीयांचे मुख्याधिकारी राहुल वाघ यांनी आभार मानून यापुढील काळातही असेच सहकार्य करण्याचे आवाहन केले.
‘स्वच्छ सुंदर व हरित संगमनेर’ शहराचे संकल्पना घेऊन तत्कालीन नगराध्यक्ष दुर्गाताई तांबे यांच्या कार्यकाळात विकास कामांबरोबरच शहराच्या सर्वांगीण स्वच्छते बरोबरच रस्त्याच्या दुतर्फा व शहरात इतरत्र मोठ्या प्रमाणात वृक्षारोपण करण्यात आले असून स्वच्छतेबाबत नगरपरिषदेने शासन पुरस्कृत स्पर्धेत सहभागी होऊन अनेक मानांकन व पुरस्कार प्राप्त केले आहे. यात संत गाडगेबाबा नागरी स्वच्छता अभियान, महाराष्ट्र शासन उत्कृष्ट नगरपरिषद पुरस्कार, स्वच्छ सर्वेक्षण अंतर्गत जीएफसी स्टार रेटिंग, ओडीएफ ++ अंतर्गत भारतात पश्चिम विभागात पाचवा क्रमांक तसेच अखिल भारतीय स्थानिक स्वराज्य संस्थेच्या महिला व बालकल्याण विभाग उत्कृष्ट पुरस्कार, माझी वसुंधरा अभियान अंतर्गत दुसरा क्रमांक, तसेच माझी वसुंधरा अभियान अंतर्गत सन २०२१/२२ मध्ये नाशिक विभागात उत्कृष्ट कामगिरी करत विविध पुरस्कार पालिकेला मिळाले आहे.
मुख्याधिकारी वाघ यांच्या मार्गदर्शनाखाली उपमुख्याधिकारी सुनील गोरडे, कार्यालय निरीक्षक राजेश गुंजाळ, आरोग्य विभागप्रमुख अश्विन पुंड, प्र. आरोग्य निरीक्षक अरविंद गुजर यांच्यासह उमेश ढोले, संगणक अभियंता विशाल कोल्हे, गौरव मंत्री, सुरेश चिंचे, बाळासाहेब साळवे, शशिकांत जोशीसह विविध विभागाच्या कर्मचाऱ्यांनी शहर स्वच्छतेसाठी परिश्रम घेतले.
संगमनेर नगर परिषदेने स्वच्छ सर्वेक्षण स्पर्धेत पश्चिम विभागात देशात तिसरा क्रमांक मिळविल्याचा निश्चितच अभिमान असून यामध्ये शहरातील नागरिकांचे मोठे योगदान व सहकार्य लाभले. हे यश सर्व शहरवासीयांचे आहे. यापुढील काळातही स्वच्छतेसाठी विविध उपक्रम राबविण्यात येऊन स्वच्छ सर्वेक्षण स्पर्धेत संगमनेर नगर परिषदेला प्रथम क्रमांकाचे मानांकन मिळविण्यासाठी सर्वतोपरी प्रयत्न करणार आहोत.
डॉ. शशिकांत मंगरूळे, प्रशासक तथा प्रांताधिकारी
