महाराष्ट्र संवाद न्यूज नेटवर्क
भाजप नेते माजी मंत्री मधुकर पिचड आणि माजी आमदार वैभव पिचड यांच्या एकहाती साम्राज्याला हादरा देत सत्तांतर करण्यात यश मिळविलेल्या आणि महाविकास आघाडीच्या वर्चस्वाखाली आलेल्या अगस्ती सहकारी साखर कारखान्याच्या अध्यक्षपदी अपेक्षेप्रमाणे सिताराम गायकर यांची तर उपाध्यक्षपदी अशोक भांगरे यांची मंगळवारी सर्वानूमते निवड करण्यात आली. 
भाजप नेते, माजी मंत्री मधुकर पिचड आणि माजी आमदार वैभव पिचड पितापुत्राच्या अधिपत्याखाली असलेल्या व नुकत्याच झालेल्या कारखान्याच्या निवडणूकीत महाविकास आघाडीने पिचड यांच्या पॅनेलचा सपशेल धुव्वा उडविला. कारखान्यावर गेली २८ वर्षे निरंकुश सत्ता भोगणाऱ्या पितापुत्रांना कारखान्याच्या या निवडणुकीत चंचुप्रवेश देखील करता आला नाही. पिचड पिता-पुत्रांनाही निवडणुकीत पराभवाचा सामना करावा लागला होता.
कारखान्यात नवे संचालक मंडळ सत्तारुढ झाल्यानंतर मंगळवारी कारखान्याच्या सभागृहात अध्यक्ष, उपाध्यक्ष निवडीसाठी निवडणूक निर्णय अधिकारी जी. जी. पुरी यांच्या अध्यक्षतेखाली बैठक बोलाविण्यात आली होती. 
अध्यक्षपदासाठी सिताराम गायकर यांचे नांव निश्चीत मानले जात होते, तर उपाध्यक्षपदी कोणाची वर्णी लागते याची उत्सुकता होती. राज्याचे विरोधी पक्षनेते अजित पवार यांच्याशी झालेल्या चर्चेनंतर त्यांनी आमदार डॉ. किरण लहामटे यांना पदाधिकाऱ्यांची नांवे कळविली. 
त्यानंतर अध्यक्षपदासाठी गायकर यांनी तर उपाध्यक्षपदासाठी भांगरे यांनी आपले अर्ज दाखल केले. दोन्ही जागांसाठी प्रत्येकी एक-एक अर्ज आल्याने या निवडी निवडणूक निर्णय अधिकाऱ्यांनी बिनविरोध जाहीर केल्या.
बैठकीसाठी संचालक रामनाथ वाकचौरे, कैलास वाकचौरे, यमाजी लहामटे, मिनानाथ पांडे, मच्छिंद्र धुमाळ, अशोक देशमुख, विक्रम नवले, विकास शेटे, सुधीर शेळके, मनोज देशमुख, सचिन दराडे, पाटीलबा सावंत, प्रदीप हासे, अशोक आरोटे, बादशहा बोंबले, पर्बतराव नाईकवाडी, कैलास शेळके, सुलोचना नवले, शांताबाई वाकचौरे उपस्थित होते.
