महाराष्ट्र संवाद न्यूज नेटवर्क
राज्यात महाविकास आघाडीचा प्रयोग घडवून आणणाऱ्या आणि महाविकास आघाडी सरकार कोसळल्यानंतर राष्ट्रवादी काँग्रेसचे सर्वेसर्वा ज्येष्ठ नेते शरद पवार टीकेचे धनी ठरले. शिवसेनेतून 40 आमदारांना घेऊन बाहेर पडलेले आणि नव्याने शिंदे-फडणवीस सरकार बनविलेले मुख्यमंत्री एकनाथ शिंदे यांनी काँग्रेस राष्ट्रवादी सोबतचे युती आपल्याला कधीच मान्य नव्हती, शिवसेनेने त्यांचे हिंदुत्व सोडले अशी टीका केली आहे. बाळासाहेब ठाकरे असते तर त्यांनी ही युती कधीच मान्य केली नसती. असे देखील शिवसेनेतून बाहेर पडलेले अनेक नेते म्हणत आहेत. मात्र प्रत्यक्षात वस्तुस्थिती वेगळीच आहे. ज्या शरद पवारांवर आज टीका केली जाते त्या पवारांचे आणि बाळासाहेब ठाकरे यांचे पक्षविरहीत राजकीय संबंध कसे होते हे यातून स्पष्ट होते.
शिवसेना फुटल्यानंतर आज ज्या ठाकरे-शिंदे गटाच्या दसरा मेळाव्याची चर्चा सुरु आहे त्या पार्श्वभूमीवरील हे फोटो 1982 च्या शिवसेनेच्या दसऱ्या मेळाव्याचे आहेत, जेव्हा शरद पवार अन जॉर्ज फर्नाडिस यांनी उपस्थित शिवसैनिकासमोर भाषणे देखील केली होती.
बाळासाहेब अन शरद पवारांचे नाते अगदी मैत्रीचे होते. राजकीय जीवनात बाळासाहेबांनी अनेकदा शरद पवारांवर जहरी टीका केल्या पण कधी शरद पवारांनी त्यांना तसे प्रत्युत्तर दिले नाही. वैयत्तिक जीवनात त्यांनी मैत्री फार जोपासली.
शरद पवारांना मीनाताईच्या हातचे जेवण आवडायचे ते धडक मातोश्रीवर जात, बाळासाहेब ‘शरद बाबू’ असं म्हणायचे.
2006 साली सुप्रिया सुळे यांना राष्ट्रवादीने राज्यसभेसाठी उमेदवारी जाहीर केली, बाळासाहेबांना हे बातम्यातून समजले. तेव्हा त्यांनी फोन करून शरद पवारांना आपली नाराजगी सुनावली, “शरदबाबू, तुम्ही मला कळवले नाही सुप्रिया राज्यसभेला उभी राहतेय ते? माझ्या समोर वाढलेली पोरं ती, तुम्हाला वाटलं नाही मला सांगाव. सुप्रिया हि माझीच लेक आहे, हि निवडणूक बिनविरोध होईल. या पुढे असं करू नका” पुढे सुप्रिया ताई राज्यसभेवर बिनविरोध निवडून आल्या.
राजकारणात एकमेकावर टीका होत राहिल्या पण मैत्रीचे बंध कधी तुटले नाहीत. राज्यसभेला मुलीला मदत करणाऱ्या बाळासाहेबांच्या मुलाला शरद पवारांनी मुख्यमंत्री करून बाळासाहेबांच्या मदतीची परतफेड केल्याचेदेखील म्हटले जाते. राजकारणात कधी काय घडेल याचा नेम नसतो, असे नेहमी म्हटले जाते मात्र राजकीय पक्ष वेगवेगळे असले तरीदेखील तात्वीक मतभेद बाजुल निखळ मैत्री जोपासणारे आजही अनेक नेते राजकारणात आहे.
