महाराष्ट्र संवाद न्यूज नेटवर्क
संगमनेर तालुक्यातील दोघा व अकोले तालुक्यातील एका सराईत गुन्हेगारांस प्रांताधिकारी डॉ. शशिकांत मंगरुळे यांनी एक वर्षाकरिता हद्दपार केले असल्याची माहिती संगमनेरचे उपविभागीय पोलीस अधिकारी राहुल मदने यांनी दिली आहे.
रमेश संतू पावसे (रा. हिवरगाव पावसा, ता. संगमनेर), सागर उर्फ शक्तिमान तुकाराम कोकण (रा. धांदरफळ खुर्द, संगमनेर) आणि ऋतिक किसन बांडे (रा. खडकी ता. अकोले) अशी या हद्दपार केलेल्या तिघा गुन्हेगारांची नावे आहेत. अकोले आणि संगमनेर तालुका पोलिसांकडून पोलीस उपविभागीय अधिकाऱ्यांकडे तसेच पोलीस उपविभागीय अधिकाऱ्यांनी प्रांत अधिकारी डॉ. शशिकांत मंगरुळे यांच्याकडे या आरोपी विरोधातील हद्दपारीचे प्रस्ताव पाठविले होते. मंगरूळ यांनी तीनही गुन्हेगारांना एक वर्षासाठी अहमदनगर जिल्ह्यातून हद्दपार केले आहे.
रमेश पावसे याच्या विरोधात संगमनेर तालुका पोलीस ठाण्यात दुखापत, गंभीर दुखापत करणे, शिवीगाळ, मारहाण, गैर कायद्याची मंडळी जमा करणे आणि जीवे ठार मारण्याचा प्रयत्न करणे अशा स्वरूपाचे गंभीर गुन्हे दाखल आहेत. तर सागर कोकण याच्या विरोधात देखील संगमनेर शहर आणि संगमनेर तालुका पोलीस ठाण्यात अवैध वाळू चोरी संदर्भात पाच गुन्हे दाखल करण्यात आलेले आहेत. याशिवाय अकोले तालुक्यातील ऋतिक किसन बांडे याच्या विरोधात राजुर पोलीस ठाण्यात घरफोडी, चोरी, गावठी हातभट्टीची दारू विक्री करणे, गंभीर दुखापत करणे, शिवीगाळ, मारहाण अशा स्वरूपाचे चार गुन्हे दाखल आहेत. या सर्व आरोपींच्या गुन्हेगारी पार्श्वभूमीचा विचार करता प्रांताधिकार्‍यांनी तीनही आरोपींना एक वर्षासाठी अहमदनगर जिल्ह्यातून हद्दपार केले आहे.
