महाराष्ट्र संवाद न्यूज नेटवर्क
अहमदनगर जिल्हा परिषदेचे घुलेवाडी गटाचे माजी जिल्हा परिषद सदस्य सिताराम राऊत यांच्यासह दहा ते पंधरा जणांविरोधात शहर पोलीस ठाण्यात ॲट्रॉसिटीचा गुन्हा दाखल करण्यात आला आहे. संगमनेरचे पोलीस उपअधीक्षक राहुल मदने या प्रकरणी पुढील तपास करत आहेत.
शहर पोलीस ठाण्यात याबाबत घुलेवाडी येथील कविता संतोष अभंग यांनी फिर्याद दिली आहे. अभंग यांनी आपल्या मालकीच्या रस्त्यावर भाजीपाला विक्रेत्यांना बसावयास परवानगी दिल्याचा राग जिल्हा परिषदेचे माजी सदस्य सिताराम राऊत यांना आला. राऊत यांनी गावातील तलाठी कार्यालय येथे अभंग यांचा रस्ता अडवून जातीवाचक शिवीगाळ केली तसेच गैर कायद्याची मंडळी जमीन त्यांच्या घराचे नुकसान केले.
या आशयाच्या अभंग यांच्या फिर्यादीवरून संगमनेर शहर पोलीस ठाण्यात अनुसूचित जाती जमाती कायद्यान्वये सिताराम राऊत, संजय पुंजा राऊत, संतोष लहानु राऊत यांच्यासह दहा ते पंधरा जणांविरोधात हा गुन्हा दाखल करण्यात आला आहे.
यापूर्वी राऊत यांना झाली होती मारहाण
अभंग यांच्याशी असलेल्या वादातून काही दिवसांपूर्वी राऊत यांना भर रस्त्यावर मारहाण करण्यात आली होती. या मारहाणीचे व्हिडिओ सोशल मीडियावर सर्वत्र व्हायरल करण्यात आले होते. या संदर्भात शहर पोलिसांनी मारहाण करणाऱ्या महिला आणि व्हिडिओ व्हायरल करणाऱ्या विरोधात गुन्हा दाखल केलेला आहे. यावरून घुलेवाडी गाव देखील बंद ठेवून ग्रामस्थांनी निषेध नोंदविला होता.
