देशाच्या सरन्यायाधीशपदी पुन्हा महाराष्ट्राला बहुमान

महाराष्ट्र संवाद न्यूज नेटवर्क
सरन्यायाधीश उदय लळीत यांचा कार्यभार येत्या 8 नोव्हेंबर रोजी संपत आहे. त्यांनी पुढील सरन्यायाधीशपदी धनंजय चंद्रचूड यांच्या नावाची शिफारस केंद्र सरकारकडे केली आहे. त्यामुळे लळीत यांच्यानंतर चंद्रचूड नवे सरन्यायाधीश असतील.निवृत्त होणारे सरन्यायाधीश नव्या सरन्यायाधीशांच्या नावाची शिफारस एक महिना आधी करतात. त्यानुसार लळीत यांनी चंद्रचूड यांच्या नावाची शिफारस केली आहे. लळित यांचा कार्यकाळ ८ नोव्हेंबर २०२२ रोजी संपत असल्याने केंद्र सरकारने त्यांना देशाच्या पुढील सरन्यायाधीशांच्या नावांची शिफारस करण्याविषयी विचारणा केली होती.लळीत यांच्यानंतर चंद्रचूड हे सर्वात वरिष्ठ न्यायमूर्ती असतील. त्यांचा कार्यकाल 10 नोव्हेंबर 2024 पर्यंत म्हणजेच दोन वर्षाचा असेल. ललित यांच्या पाठोपाठ देशाला पुन्हा मराठी सरन्यायाधीश लाभणार आहेत. चंद्रचूड यांनी मुंबई उच्च न्यायालयात न्यायाधीश म्हणून काम केले आहे. काही काळ ते अलाहाबाद न्यायालयाचे मुख्य न्यायाधीश होते.चंद्रचूड यांचे वडील यशवंत चंद्रचूड हे देखील सात वर्ष चार महिने अशा प्रदीर्घकाळासाठी सरन्यायाधीश होते. पुढील महिन्यात निवृत्त होणारे न्यायाधीश यांचा कार्यकाळ केवळ 74 दिवसांचा ठरला.