महाराष्ट्र संवाद न्यूज नेटवर्क
देशात सहकार मंत्रालय स्थापन करुन पंतप्रधान नरेंद्र मोदी सहकारी साखर कारखानदारीबद्दल अनेक मोठे निर्णय घेत आहेत. तर सहकार मंत्री अमित शाह यांच्या माध्यमातून सहकार चळवळ सक्षम होत आहे. आपल्या कारखान्याने संघर्षाचे दिवस बघीतले, आता चांगले दिवस आपण बघत आहोत. आपल्या सर्वांच्या पाठबळाने नामदार विखे पाटील मोठ्या मंत्रीपदावर पोहोचले याची उतराई म्हणून इतरांपेक्षा चांगला भाव देण्याच्या स्पर्धेत विखे पाटील सर्वांच्या पूढे असेल, असे प्रतिपादन खासदार डॉ. सुजय विखे पाटील यांनी केले.
पद्मश्री डॉ. विठ्ठलराव विखे पाटील सहकारी साखर कारखान्याच्या ७३ व्या गळीताची सुरुवात खासदार डॉ. सुजय विखे पाटील यांच्या उपस्थितीत करण्यात आली. कारखान्याचे माजी अध्यक्ष भास्करराव खर्डे अध्यक्षस्थानी होते. 
यावेळी जिल्हा परिषदेच्या माजी अध्यक्षा शालिनीताई विखे पाटील, गणेश कारखान्याचे अध्यक्ष मुकूंद सदाफळ, उपाध्यक्ष विश्वास कडू, प्रवरा बॅकेचे अध्यक्ष अशोक म्हस्के, नंदू राठी, गीता थेटे, भाजपाचे तालुकाध्यक्ष ज्ञानेश्वर गोंदकर आदी यावेळी व्यासपिठावर उपस्थित होते.
खा. डॉ. विखे म्हणाले, पद्मश्री डॉ. विठ्ठलराव विखे पाटील सहकारी साखर कारखान्याचा प्रवास आता योग्य दिशेने सुरु आहे. चांगले वाईट दिवस आणि प्रदीर्घ संघर्ष करत कारखान्याची वाटचाल राहीली आहे. डॉ. विखे पाटील कारखाना आता स्वतंत्र झाल्याने प्रवरा कुटूंबातील सभासदांच्या उत्कर्षासाठीच यापुढे वाटचाल करेल. 
ऊस भावातदेखील आता हा कारखाना इतरांच्या पुढे असेल. आता केवळ आपला डॉ. विखे पाटील कारखाना केंद्रस्थानी ठेवून महसूल मंत्री राधाकृष्ण विखे पाटील यांच्या मार्गदर्शनाखाली गाळपाचे उद्दीष्ठ साध्य करण्याचे आवाहन त्यांनी यावेळी केले.
