महाराष्ट्र संवाद न्यूज नेटवर्क
शिवसेना (उद्धव बाळासाहेब ठाकरे) गटाचे नेते आमदार भास्कर जाधव यांच्या चिपळूणमधील घरावर मध्यरात्री हल्ला करण्याचा प्रयत्न झाल्याची माहिती समोर येत आहे. सतर्कता म्हणून जाधव यांच्या घरी पोलिस बंदोबस्त वाढविण्यात आला आहे. 
जाधव यांच्या चिपळूण (रत्नागिरी) येथील निवासस्थानासमोर दगड, क्रिकेटचे स्टंप आणि काचेच्या बाटल्या आढळल्याने परिसरात तणावाचे वातावरण निर्माण झाले आहे. घटनेची माहिती मिळताच शिवसैनिकांनी जाधव यांच्या निवासस्थानी धाव घेत गर्दी करण्यास सुरुवात केली. कुडाळ मध्ये मंगळवारी वैभव नाईक यांच्या समर्थनार्थ काढण्यात आलेल्या मोर्चामध्ये जाधव सहभागी झाले होते. त्यानंतर रात्रीच ते मुंबईला रवाना देखील झाले होते. 
मात्र आज सकाळी त्यांच्या निवासस्थानी दगड क्रिकेटचे स्टंप आणि काचेच्या बाटल्या आढळून आल्या. त्यामुळे मध्यरात्री त्यांच्या चिपळूण मधील घरावर हल्ल्याचा प्रयत्न झाल्याचा आणि घराबाहेर आढळलेल्या बाटल्यांमध्ये ज्वलनशील पदार्थ असल्याचा संशय वर्तविण्यात येत आहे. 
दरम्यान जाधव यांच्या निवासस्थानाच्या आवारात सापडलेल्या या वस्तूंच्या आधारे हा खरंच हल्ला करण्याचा प्रयत्न होता की आणखीन काही? या दिशेने स्थानिक पोलीस यंत्रणा तपास करत आहेत.
खासदार विनायक राऊत म्हणाले हल्ला करणाऱ्यांना आयुष्यभराचा धडा शिकविला जाईल
दरम्यान या संदर्भात शिवसेना ठाकरे गटाचे नेते खासदार विनायक राऊत यांची प्रतिक्रिया समोर आली आहे ते म्हणाले, “भास्कर जाधवांसारख्या शिवसेना नेत्याच्या घरावर अशा प्रकारे हल्ल्याचा प्रयत्न कुणी करत असेल, तर त्यांनी लक्षात ठेवावं की शिवसैनिकांवर हल्ला करणाऱ्यांना तिथल्या तिथे जाब विचारला जाईल आणि आयुष्यभराचा धडा शिकवला जाईल”.
