महाराष्ट्र संवाद न्यूज नेटवर्क
बापानेच आपल्या स्वत:च्या अल्पवयीन मुलीवर अत्याचार केल्याची घटना संगमनेरमध्ये समोर आली आहे. या प्रकरणी संगमनेर शहर पोलीस ठाण्यात नातीवर झालेल्या या अत्याचाराची मुलाविरोधात आजीनेच तक्रार दिल्याने हा प्रकार समोर आला.
या विकृताची पत्नी दहा वर्षापूर्वीच त्याला सोडून गेली आहे. त्यावेळेपासून दोन नातवंड व त्यांच्या वडील मुलाचा सांभाळ फिर्यादी करत आहे. मोलमजुरी करुन ही वृध्दा मुलगा आणि नातवंडाचा सांभाळ करते. आरोपी कामधंदा न करता घरीच असतो. गेल्या आठवड्यात नातीने आपल्या पोटात दुखत असल्याची तक्रार आजीकडे केली. त्यामुळे आजीने तिला घुलेवाडी येथील ग्रामीण रुग्णालयात तपासण्यासाठी नेले. तेथून औषधे घेवून घरी आल्यानंतर आजीने नातीस पोट दुखण्याचे कारण विचारले असता तिने रडतच झालेल्या प्रकाराची माहिती आजीला दिली.
सहा महिन्यापासून बापाने मुलीला वारंवार मारहाण करत घरात कोणी नसल्याचा गैरफायदा घेत तिच्यावर वेळोवेळी अत्याचार केले. कुणाला काही सांगितले तर घरातून बाहेर हाकलून देईल, अशी धमकी दिल्याने मुलगी आपल्यावरील अत्याचार सहन करत होती. 
हे ऐकल्यानंतर आजीच्या पायाखालची जमीन सरकली. संतापलेल्या आजीने नातीला घेवून पोलीस ठाणे गाठले आणि स्वत:च्या विकृत मुलाविरोधात तक्रार दिली. पोलीसांनी आरोपीला अटक केली असल्याची माहिती मिळाली.
