महाराष्ट्र संवाद न्यूज नेटवर्क
न्यायालयात सुरू असलेल्या सुनावणी दरम्यान तक्रारदारा विरोधात आणखी गुन्हे दाखल आहेत का याची चौकशी करून न्यायालयात अहवाल देण्यासाठी तीन हजार रुपयांची लाच स्वीकारणाऱ्या जिल्हा परिविक्षा अधिकारी महेश अनंतराव पाटील यांना लाच लुचपत विभागाच्या अधिकाऱ्यांनी रंगेहाथ पकडले. 
पाटील यांच्या विरोधात नगरच्या तोफखाना पोलीस ठाण्यात गुन्हा दाखल करण्याची प्रक्रिया गुरुवारी रात्री उशिरापर्यंत सुरू होती. नगर तालुक्यातील जेऊर बायजाबाई येथील तक्रारदाराविरोधात २०२० मध्ये एमआयडीसी पोलीस ठाण्यात मारामारीचा गुन्हा दाखल असून या गुन्ह्याची सुनावणी न्यायालयात सुरू आहे.
न्यायालयाने या तक्रारदारा विरोधात आणखी काही गुन्हे दाखल आहेत का याची चौकशी करून अहवाल सादर करण्याचे निर्देश जिल्हा परिविक्षा अधिकाऱ्यांना दिले होते. 
त्या अनुषंगाने तक्रारदारा विरोधात आणखी इतर काही गुन्हे दाखल नसल्याबाबतचा अहवाल न्यायालयात पाठविण्यासाठी आरोपी जिल्हा परिविक्षा अधिकारी महेश पाटील (रा. सोलापूर) यांनी तक्रारदाराकडे तीन हजार रुपयांची लाच मागितली होती. 
त्यामुळे तक्रारदाराने अहमदनगरच्या लाच लुचपत विभागाकडे या संदर्भात तक्रार केल्यानंतर लाच लुचपतचे पोलीस उपाधीक्षक हरीश खेडकर यांच्या मार्गदर्शनाखाली पोलीस निरीक्षक शरद गोरडे, पोलीस हवालदार संतोष शिंदे, पोलीस नाईक रमेश चौधरी, विजय गंगुल, पोलीस अंमलदार रवींद्र निमसे, वैभव पांढरे, बाबासाहेब कराड, महिला पोलीस नाईक संध्या म्हस्के, चालक पोलीस हवालदार हरुण शेख, राहुल डोळसे यांच्या पथकाने आरोपीच्या कार्यालयात गुरुवारी सापळा लावला.
यावेळी तक्रारदाराकडून लाचेची रक्कम स्वीकारताना आरोपी महेश पाटील यांना रंगेहाथ पकडण्यात आले.
