महाराष्ट्र संवाद न्यूज नेटवर्क
सोलापूर जिल्हा परिषदेतील लाचखोर शिक्षणाधिकारी किरण अनंत लोहार याला एका शैक्षणिक संस्थेच्या अध्यक्षाकडून २५ हजाराची लाच घेतांना सोलापूर लाचलुचपत विभागाच्या पथकाने रंगेहाथ पकडले आहे. यामूळे राज्याच्या शिक्षण वर्तुळात खळबळ उडाली असून वरिष्ठ शिक्षण अधिकाऱ्याचा लाचखोरीचा विषय चव्हाट्यावर आला आहे. लोहार याच्याविरोधात सोलापूर शहरातील सदर बझार पोलीस ठाण्यात गुन्हा दाखल करण्याची प्रक्रीया रात्रीपर्यत सुरु होती.
शिक्षणाधिकारी लोहार याने एका शैक्षणिक संस्थेच्या अध्यक्षाकडे ऑनलाईन असलेल्या युडायस प्लस या प्रणालीमध्ये त्यांच्या शाळेचे ८ वी ते १० वी चे वर्ग वाढ करण्याबाबत अर्ज केला असून संबधित संस्थेचे तक्रारदार अध्यक्ष हे या अर्जाबाबत पाठपुरावा करत असतांना शिक्षणाधिकारी लोहार याने ऑनलाईन असलेल्या युडायस प्लस प्रणालीमध्ये तक्रारदार यांच्या शाळेचे वर्ग वाढ करुन जोडण्यासाठी ५० हजार रुपयांची लाच मागितली. तडजोडीअंती ही रक्कम २५ हजार रुपये देण्याचे निश्चीत झाले होते.
यासंदर्भात संबधित संस्थेच्या अध्यक्षांनी सोलापूर लाच लुचपत विभागाशी संपर्क केला असता सोलापूरचे पोलीस उपअधीक्षक संजीव पाटील यांच्या मार्गदर्शनाखाली पोलीस निरीक्षक उमाकांत महाडीक, पोलीस निरीक्षक चंद्रकांत कोळी यांच्या नेतृत्वाखालील लाच लुचपत विभागाच्या पथकाने शिक्षणाधिकारी लोहार याला २५ हजार रुपयांची लाच स्विकारतांना रंगेहाथ पकडले.
