महाराष्ट्र संवाद न्यूज नेटवर्क
संगमनेरमध्ये पोलीस यंत्रणेचा धाक संपुष्टात आल्याने शहरातील गजबजलेल्या ठिकाणी अकोल्या नाका परिसरात दुचाकीवरून आलेल्या दोघा चोरट्यांनी महिलेच्या गळ्यातील दोन तोळ्याचे गंठण लंपास केले आहे. चोरटे पसार झाले असून त्यांचा शोध लावण्याचे आव्हान पोलिसांसमोर उभे ठाकले आहे.
गुन्हेगारांवर धाक निर्माण करण्याचे काम पोलीस यंत्रणेचे असते मात्र शहरात गेल्या काही दिवसांपासून हे चित्र दुर्मिळ बनले आहे शहरातील गुन्हेगारीत मोठी वाढ झाली असून दररोज दुचाकी चोऱ्या सुरू असतानाच आता महिलांच्या गळ्यातील मंगळसूत्र देखील धूम स्टाईलने लंपास करण्याच्या घटना घडू लागल्या आहेत. वरवर हे प्रकार किरकोळ दिसत असले तरी पोलीस यंत्रणा मात्र याबाबतीत फारशी गंभीर दिसत नाही.
सकाळी साडेअकरा वाजण्याच्या सुमारास शहर पोलीस ठाण्यापासून अवघ्या काही अंतरावर असलेल्या अकोले नाका येथे अकोले येथील रुग्णालयात जाण्यासाठी मनीषा राधाकिसन आभाळे ही महिला पुलाजवळून जात असताना समोरून चुकीच्या दिशेने भरधाव वेगाने आलेल्या मोटरसायकलवर हेल्मेट घालून मागे बसलेल्या अज्ञात व्यक्तीने या महिलेच्या गळ्यातील दोन तोळे सोन्याचे गंठण ओढून नेले.
गळ्यातून गंठण दुचाकी वरील व्यक्तीने ओढल्याचे लक्षात येताच महिलेने आरडाओरडा केला. त्यामुळे तेथे जमलेल्या काही जणांनी चोरट्यांचा पाठलाग देखील करण्याचा प्रयत्न केला मात्र, ते यशस्वी ठरले नाही. चोरटे गंठण घेऊन पसार झाले. दरम्यान यासंदर्भात संबंधित महिलेच्या तक्रारीवरून शहर पोलीस ठाण्यात गुन्हा नोंदविण्याचे काम सुरू होते. यापूर्वी देखील अशाच प्रकारच्या दागिने लंपास करण्याच्या घटना घडल्या आहेत. क्वचित एखादा अपवाद वगळता यातील गुन्हेगार शोधण्यास पोलीस अयशस्वी ठरले आहेत.
संगमनेर शहरात अनेक ठिकाणी सीसीटीव्ही कॅमेरे बसविण्यात आले असून त्याचा कंट्रोल देखील शहर पोलीस ठाण्यात आहे. मात्र अशा प्रकारच्या गुन्ह्यात सीसीटीव्ही कॅमेऱ्याची फारशी मदत झाल्याचे दिसत नाही.
