महाराष्ट्र संवाद न्यूज
गुजरात निवडणुकीच्या पार्श्वभूमीवर महाराष्ट्राच्या तपासणी नाक्यावर पालघरच्या तलासरी पोलिसांनी मेड इन युएसए असा शिक्का असलेले परदेशी मार्क असलेले पिस्टल आणि काडतुसे घेऊन फिरणाऱ्या संगमनेर मधील तिघा जणांना अटक केली आहे. या तिघांकडून पोलिसांनी पिकअप जीप, पिस्टल आणि काडतुसे असा आठ लाख वीस हजार सातशे रुपयांचा मुद्देमाल जप्त केला आहे.
इरफान युनुस शेख (वय- २५ वर्षे, धंदा-व्यापार, रा. कुरण रोड, ता. संगमनेर जि. अहमदनगर), मुसा हारुण शेख (वय- २८ वर्षे, व्यवसाय शेती, रा. कुरण रोड, ता. संगमनेर जि. अहमदनगर), समित लाजरस खरात (वय ३० वर्षे, व्यवसाय चालक, रा. कुरण रोड, महादेव वस्ती ता. संगमनेर जि. अहमदनगर) अशी पकडलेल्या तिघांची नावे आहेत.
यासंदर्भात अधिक माहिती अशी की, गुजरात निवडणुकीच्या पार्श्वभूमीवर गेल्या आठवड्यात तलासरी पोलिसांनी गुजरात महाराष्ट्राच्या सीमेवर उधवा कोदाड रस्त्यावर नाकाबंदी केली होती. या नाकाबंदी दरम्यान उधवा कोदाड रस्त्यावर दळवी पाडा येथे पोलिसांनी पिकअप जीप क्र. एम.एच ४१ जी ३२७३ अडविली असता पिकअप जीप मधील तिघांनी आपण गुजरातला जात असल्याचे सांगितले. मात्र पोलिसांचा संशय बळवल्याने त्यांनी पिकअपची तपासणी केली असता त्यांना एका प्लास्टिक पिशवीमध्ये एक पिस्टल आणि काडतुसे आढळून आली. 
MADE IN U.S.A मार्क असलेले एक पिस्टल (कट्टा) तिस पकडण्याच्या ठिकाणी दोन्ही बाहेरील बाजुला लाकडी प्लेट स्क्रू ने फिट केलेल्या असून सदरचे पिस्टल सुमारे ६ सेमी लांबीचे व सुमारे साडेचार इच रुंदीचे आहे. तसेच k.f 7.65 मार्क असलेले पिस्टल (कट्टा ) चे जिवंत दोन राऊंड मिळून आले. पोलिसांनी पिकअपसह आरोपी जवळ आढळलेली शस्त्र जप्त केली असून आरोपींना अटक केली. यासंदर्भात सहाय्यक पोलीस उपनिरीक्षक रविंद्र दुंदु सातवी यांनी फिर्याद दिली असून तलासरी पोलीस ठाण्यात ३८६/२०२२ भादवि कलम ३४ सह, भारतीय हत्यार कायदा कलम ३, २५ सह, महाराष्ट्र पोलीस अधिनियम १९५१ चे कलम ३७ (१)(३) १३५ प्रमाणे गुन्हा दाखल करण्यात आला असून पुढील तपास पोलीस उपनिरीक्षक समीर लोंढे हे करत आहेत.
दरम्यान तीनही आरोपी संगमनेर तालुक्यातील असल्याने संगमनेर तालुक्यात एकच खळबळ उडाली आहे. यासंदर्भात संगमनेरच्या बजरंग दलाने पोलीस अधीक्षकांना निवेदन दिले असून सदर आरोपी हे गोवंश हत्या व गोवंश मांस तस्करी करणारे आहेत. त्यांच्यावर गुन्हे दाखल आहेत. याची सखोल चौकशी झाली तर संगमनेर तालुक्यातील कुरण या ठिकाणी अवैध शस्त्रे सापडण्याची दाट शक्यता आहे. त्यानुसार अहमदनगर पोलिसांनी कायदेशीर कारवाई करावी अशी मागणी बजरंग दलाच्या वतीने करण्यात आलेली आहे. तसे निवेदन बजरंग दलाचे नगर विभाग संयोजक सचिन कानकाटे व साहेबराव वलवे यांनी पोलीस अधीक्षकांना दिले आहे.
