महाराष्ट्र संवाद न्यूज
मोठ्या शहरातील वेश्याव्यवसायाचे लोन संगमनेरच्या ग्रामीण भागात पोहोचले आहे. श्रीरामपूरचे पोलीस उपाधीक्षक संदीप मिटके यांच्या पथकाने याप्रकरणी एका महिलेला ताब्यात घेतले असून दोन पीडित मुलींची सुटका केली. ग्रामीण भागात पोलिसांनी केलेल्या कारवांमुळे खळबळ उडाली आहे.
लॉजेससह अन्य काही ठिकाणी चालणारे अनैतिक धंदे सर्वश्रुत असले तरी ग्रामीण भागातही आता अशा प्रकारचे व्यवसाय सुरू झाले असल्याचे या कारवाईमुळे स्पष्ट झाले.
नासिक पुणे महामार्गावरील चंदनापुरी घाटालगत पोखरी बाळेश्वर शिवारामध्ये वेश्या व्यवसाय सुरू असल्याची माहिती श्रीराम पोलीस उपाधीक्षक संदीप मिटके यांना मिळाली होती. त्यानंतर मिटके यांनी आपल्या पथकाला कारवाईसाठी पाठविले होते. गुरुवारी पहाटेच्या वेळी पथकाने मिळालेल्या माहितीच्या आधारे घटनास्थळी बनावट ग्राहकाला पाठविले. या ग्राहकाच्या आधारे संबंधित ठिकाणी वेश्या व्यवसाय सुरू असल्याची खात्री झाल्यानंतर पथकाने छापा टाकला. कारवाईत पथकाने एका महिलेला ताब्यात घेत दोन परप्रांतीय पीडित मुलींची सुटका केली आहे.
संगमनेर तालुक्यातील घारगाव पोलीस ठाण्यात मुलींचे अनैतिक व्यापारास प्रतिबंध अधिनियम कलमान्वये या पीडित मुलींकडून वेश्याव्यवसाय करून घेणाऱ्या महिले विरोधात गुन्हा दाखल करण्यात आला आहे. या कारवाईमुळे टाकसेवाडी, पोखरी बाळेश्वर परिसरात आणि संगमनेर शहरातील अवैध धंदे करणार्यांचे धाबे दणाणले आहे. 
सदरची कारवाई जिल्हा पोलीस अधीक्षक राकेश ओला, अप्पर पोलीस अधीक्षक स्वाती भोर यांच्या मार्गदर्शनाखाली पोलीस उपाधीक्षक संदीप मिटके, संगमनेर तालुका पोलीस ठाण्याचे निरीक्षक अरुण आव्हाड, सहाय्यक पोलीस निरीक्षक ज्ञानेश्वर थोरात, पोलीस नाईक मनोज पाटील, पोलीस कॉन्स्टेबल नितीन शिरसाठ, महिला पोलीस कॉन्स्टेबल मंगल जाधव यांनी केल्याची माहिती मिळाली.
