गाळा घेण्यासाठी माहेरून पैसे आणावे यासाठी विवाहितेला जीवे मारण्याचा प्रयत्न

महाराष्ट्र संवाद न्यूज

गाळा घेण्यासाठी आई-वडिलांकडून पैसे घेऊन यावे यासाठी, विवाहितेला लाथा बुक्क्याने मारहाण करत तिच्या गळ्यातील ओढणीने तिला जिवे मारण्याचा प्रयत्न केल्याचा आरोपावरून संगमनेरमधील चौघांविरोधात शहर पोलीस ठाण्यात गुन्हा दाखल करण्यात आला आहे.

सानिया नजर पठाण (वय 19 वर्षे, रा. हाजीनगर कोल्हेवाडी रोड, सगमनेर) या महिलेच्या तक्रारीवरून आरोपीं विरोधात जीवे मारण्याचा प्रयत्न, छळ केल्याचा गुन्हा नोंदविण्यात आला आहे. आरोपींमध्ये पती, दीर, सासू आणि सासऱ्याचा समावेश आहे. शहरातील खाजगी रुग्णालयात उपचार घेणाऱ्या फिर्यादीने दिलेल्या तक्रारीत म्हटले आहे की, सासरच्या लोकांनी बाळंतपणासाठी मला माहेरी पाठवले होते. पाच सहा महिन्यांचा कालावधी उलटून देखील सासरकडील लोक मला घेण्यासाठी आले नाही. उलट गाळा घेण्यासाठी माझ्या वडिलांकडे ते पैशाची मागणी करू लागले. पैसे दिले तरच नांदविण्यात घेऊन जातो, असे ते म्हणू लागले. त्यामुळे नातेवाईकांच्या घेतलेल्या बैठकीत त्यांनी मला नांदविण्याचे कबूल केले होते.

त्यानंतर वडिलांनी मला सासरी आणून सोडले असता तू पैसे का आणलेले असे विचारणा करण्यास सुरुवात केली व घरातून निघून जा म्हणू लागले. ११ डिसेंबरला रात्री नऊ वाचण्याच्या सुमारास पती नजर रियाज पठाण, दीर अजहर रियाज पठाण, सासरा रियाज ताजखान पठाण आणि सासू अरिफा रियाज पठाण यांनी आत्ताच्या आत्ता वडिलांकडून पैसे घेऊन यावे नाहीतर घरात राहू नको असे म्हणत मला शिवीगाळ आणि मारहाण करण्यास सुरुवात केली. यावेळी दिर अजहर पठाण याने माझे दोन्ही हात धरले, नव-याने माझे गळ्यात असलेली ओढणीने गळा आवळला. सासुने पोटात लाथा मारल्या व सास-याने दोन्ही पाय घट्ट धरुन सासरा व सासु पतीस म्हणाले की, तिच्या

गळ्याला फाशी दे, तिला मारुन टाक, असे म्हणुन नव-याने दोन्ही हाताने ओढणी जोरात ओढुन माझा गळा आवळला.

यामुळे विवाहितेचा श्वास कोंडल्याने ती बेशुद्ध हा प्रकार घडत असताना अचानकपणे वडील आयुब बेग हे माझ्या लहान मुलाचे कपडे घेऊन घरी आले असताना त्यांनी मला बेशुद्ध अवस्थेत बघितल्याने उपचारासाठी रुग्णालयात हलविण्यासाठी कलीम सलीम शेख यांना बोलविले. यावेळी माझ्या सासरच्या लोकांनी त्यांनाही मारहाण केली.

वडिलांनीच उपचारासाठी मला खाजगी रुग्णालयात बेशुद्ध अवस्थेत दाखल केले. अशा आशयाची तक्रार विवाहितेने शहर पोलीस ठाण्यात दिल्यानंतर संबंधितांविरोधात गुन्हा दाखल करण्यात आला आहे. पुढील तपास पोलीस उपनिरीक्षक बारकू जाणे करत आहेत.