महाराष्ट्र संवाद न्यूज
निवडणूक निकालाची परिणती दोन गटाच्या हाणामारीमध्ये झाल्याने परस्पर विरोधी तक्रारीवरून संगमनेर तालुका पोलीस ठाण्यात अंभोरे येथील तब्बल 30 जणांविरोधात गुन्हे दाखल करण्यात आले आहे. निवडणूक निकालानंतर झालेल्या हाणामारीत शेतकरी विकास मंडळाचे (थोरात गट) विजयी उमेदवार नारायण सहादु खेमनर यांना गंभीर दुखापत झाल्याने त्यांना संगमनेरातील खासगी रुग्णालयात दाखल करण्यात आले.
मंगळवारी संगमनेर तालुक्यातील 37 ग्रामपंचायतीचे निवडणूक निकाल जाहीर झाले. यात राजकीय दृष्ट्या महत्त्वपूर्ण असलेल्या अंभोरे गावच्या ग्रामपंचायतीचाही समावेश होता. निवडणूक निकालानंतर अंभोऱ्यात मात्र शांततेऐवजी हाणामारीची किनार लाभली आहे. राजकीय प्रतिष्ठेचा प्रश्न निर्माण झाल्याने दोन्ही गटांकडून तालुका पोलीस ठाण्यात परस्परविरोधी तक्रारी दाखल करण्यात आल्या. 
जनसेवा मंडळाच्या (विखे गट) वतीने तालुका पोलीस ठाण्यात सचिन संपत खेमनर (रा. शिकारे वस्ती, अंभोरे) यांनी व दुसरी फिर्याद कोमल शरद खेमनर यांनी दिली. दोन्ही गटाच्या वतीने तक्रारीत निष्पन्न झालेल्या आरोपी विरोधात बेकायदा जमाव जमवून दंगल घडविणे प्राण घातक शास्त्र आणि हल्ला करून जखमी करणे, धमकी देणे, शिवीगाळ करणे व जिल्हाधिकाऱ्यांनी लागू केलेल्या प्रतिबंधात्मक आदेशाचे उल्लंघन केल्याप्रकरणी गुन्हा दाखल केला आहे. निवडणुकीनंतर या प्रकाराला राजकीय वळण लागल्याने कायदा व सुव्यवस्था राखण्याचे आव्हान पोलीस यंत्रणेसमोर निर्माण झाले आहे.
