महाराष्ट्र संवाद न्यूज
अहमदनगर : व्यवसायासाठी काढण्यात आलेला जीएसटी नंबर फाईल न केल्यामुळे रद्द करण्यात आला होता. तो पुन्हा कार्यान्वित करण्यासाठी तक्रारदाराकडे चार हजार रुपयांच्या लाचेची मागणी करणाऱ्या महिला राज्यकर अधिकाऱ्याविरोधात अँटी करप्शन विभागाने नगरच्या भिंगार कॅम्प पोलीस ठाण्यात गुन्हा दाखल केला आहे.
सारिका जयवंत निकम (वय 39 वर्ष) असे लाचेची मागणी करणाऱ्या जीएसटी (वस्तू व सेवा कर) विभागाच्या आरोपी महिला राज्य कर अधिकाऱ्याचे नाव आहे. निकम यांनी मोहरी तालुका पाथर्डी येथील तक्रारदाराच्या जुलै 2022 मध्ये जीएसटी नंबर रिटर्न फाईल न केल्यामुळे रद्द केला होता. व्यवसायासाठी असलेला जीएसटी नंबर पुन्हा कार्यान्वित करण्यासाठी निकम यांनी 17 ऑक्टोबरला तक्रारदाराकडे पाच हजार रुपयांच्या लाचेची मागणी केली होती.
त्यामुळे तक्रारदाराने अहमदनगरच्या अँटी करप्शन विभागाशी संपर्क करा महिला अधिकारी निकम यांच्या विरोधात तक्रार केली होती. तक्रारीच्या अनुषंगाने अँटी करप्शन विभागाने पंचासमक्ष पडताळणी केली असता आरोपी महिला अधिकारी निकम यांनी चार हजार रुपये लाच म्हणून घेण्याचे मान्य केले होते. त्यामुळे महिला आरोपी निकम यांच्या विरोधात भिंगार कॅम्प पोलीस ठाण्यात जिल्हा दाखल करण्यात आला आहे.
नाशिक परिक्षेत्राच्या पोलीस अधीक्षक श्रीमती शर्मिष्ठा वालावलकर, अप्पर पोलीस अधीक्षक नारायण न्याहळदे, नगर अँटी करप्शनचे पोलीस उपाधीक्षक हरीश खेडकर यांच्या मार्गदर्शनाखाली सापळा अधिकारी शरद गोर्डे, पोलीस नाईक रमेश चौधरी, पोलीस कॉन्स्टेबल सचिन सुद्रुक, महिला पोलीस नाईक राधा खेमनर, संध्या मस्के, चालक तागड आदींचा पथकामध्ये समावेश होता.
आवाहन
कोणीही लोकसेवक सामान्य जनतेला त्यांचे काम करून देण्यासाठी लाचेची मागणी करत असेल तर लाच लुचपत प्रतिबंधक विभाग अहमदनगर यांच्याशी १०६४ या टोल फ्री क्रमांकावर अथवा ०२४१-२४२३६७७ या दूरध्वनी क्रमांक वर संपर्क साधण्याचे आवाहन पोलीस उपाधीक्षक हरीश खेडकर यांनी केले आहे.
