महाराष्ट्र संवाद न्यूज
निफाड : सेवानिवृत्तीस पाच महिन्यांचा कालावधी राहिला असताना महिला नायब तहसीलदार कल्पना शशिकांत निकुंभ यांच्यासह त्यांचा साथीदार कोतवाल अमोल राधाकृष्ण कटारे अँटी करप्शनच्या जाळ्यात अडकला आहे.
तक्रारदाराची पिंपळगाव नजीक असलेली शेत जमीन बिनशेती करण्यासाठी प्रलंबित असलेल्या कामकाजाबाबत निफाड तहसील कार्यालयात प्रलंबित असलेल्या फाईलवरील कार्यालयीन टिप्पणीवर सही करून ते प्रकरण तहसीलदारांकडे पाठविण्यासाठी नायब तहसीलदार कल्पना निकुंभ यांनी तक्रारदार शेतकऱ्याकडे चाळीस हजार रुपयांच्या लाचेची मागणी केली होती. संबंधित शेतकऱ्याने यासंदर्भात अँटी करप्शन विभागाकडे तक्रार दाखल केली होती.
या तक्रारीच्या आधारे अँटी करप्शन विभागाच्या अधिकाऱ्यांनी खात्री केली असता तडजोडीअंती पस्तीस हजार रुपये देण्याचे ठरले. 
त्यानुसार बुधवारी दुपारी चार वाजता लाचखोरांना पकडण्यासाठी सापळा लावला होता. दरम्यान नायब तहसीलदार निकुंभ यांच्या सांगण्यावरून प्रशासकीय इमारतीच्या पुरुष प्रसाधनगृहामध्ये लाचेची पस्तीस हजार रुपयांची रक्कम स्वीकारणाऱ्या कोतवाल अमोल राधाकृष्ण कटारे याला रंगेहाथ पकडले.
लाचलुचपत प्रतिबंधक विभागाच्या अधीक्षक शर्मिष्ठा वालावलकर, अप्पर अधीक्षक नारायण न्याहळदे, वाचक पोलीस उपाधीक्षक नरेंद्र पवार यांच्या मार्गदर्शनाखाली पोलीस निरीक्षक अनिल बागुल, पोलिस निरीक्षक गायत्री जाधव, अजय गरुड, किरण अहिरराव, संतोष गांगुर्डे यांच्या पथकाने ही कारवाई केली. लाचखोर नायब तहसीलदार कल्पना निकुंभ यांचा सेवनिवृत्तीचा काळ पाच महिन्यावर आला असतांना त्यांना या कारवाईला सामोरे जावे लागले आहे.
