महाराष्ट्र संवाद न्यूज नेटवर्क
संगमनेर : युवा सेना प्रमुख आणि माजी मंत्री आदित्य ठाकरे यांनी शिवसेनेतील मुस्लिम मावळा म्हणून गौरविलेल्या संगमनेरमधील शिवसेना (उद्धव बाळासाहेब ठाकरे) पक्षाच्या शाखाप्रमुखाला अज्ञात व्यक्तीने दिलेल्या एका पत्राद्वारे जीवे मारण्याची धमकी दिली आहे. शहर पोलीस ठाण्यात या संदर्भात भारतीय दंड संहितेच्या कलम 507 नुसार नुसार अज्ञात व्यक्ती विरोधात अदखलपात्र गुन्हा दाखल करण्यात आला आहे.
शिवसेना शाखाप्रमुख अजित याकूब मोमीन यांनी संगमनेर शहर पोलिसांकडे दिलेल्या तक्रारीत म्हटले आहे की, एका अज्ञात इसमाने मोमीनपुरा येथील घरी एक पत्र आणून दिले असल्याची माहिती मोमीन यांच्या मोठ्या भावाने त्यांना मोबाईलवर दिली. फिर्यादी मोमीन यांनी सदरचे पत्र बघितले असता त्याचे पाकीट फोडलेल्या अवस्थेत होते. तसेच आतील पत्रावर मोमीन यांना जीवे मारण्यासंदर्भातील मजकूर असल्याचे तक्रारीत म्हटले आहे.
तसेच काही दिवसांपूर्वी मोमीन यांच्या मोबाईल व्हाट्सअपवर अज्ञात व्यक्तीने सोशल मीडियावर जास्त उड्या मारू नको, 50 खोक्यांच्या मुद्द्यावर बोलायचा तुझा काही एक संबंध नाही. नाहीतर तुझा बेत पाहू, अशा आशयाची धमकी दिली होती. त्या पाठोपाठ दुसऱ्यांदा पत्राद्वारे मोमीन यांना धमकी आल्याने त्यांनी पोलिसांकडे धाव घेतली आहे.
मोमीन यांना मिळालेल्या धमकीच्या आधारे पुढील तपास शहर पोलीस करत आहेत. राज्यात शिवसेनेतील बंडानंतर मुस्लिम मावळा म्हणून मोमीन चर्चेत आले आहेत.
शिवसेना (उद्धव बाळासाहेब ठाकरे) पक्षातर्फे करण्यात आलेल्या आंदोलनात देखील ते अग्रभागी होते. शिवसेना शाखाप्रमुख म्हणून प्रभागातील रस्त्याच्या कामासंदर्भात त्यांनी शिवसेना शहर प्रमुख अमर कतारी यांच्या समवेत पालिका प्रशासनाशी संघर्ष करत रस्त्याचे काम मार्गी लावण्यास हातभार लावला होता. अल्पावधीतच त्यांनी निष्ठावंत शिवसैनिक म्हणून पक्षात स्थान मिळविले आहे.
