महाराष्ट्र संवाद न्यूज नेटवर्क
संगमनेर : रस्त्यावर दुकान टाकून बॅग विकण्याच्या कारणावरून झालेल्या भांडणाची परिणती थेट चाँपरचा वापर करत हल्ल्यापर्यंत जाऊन पोहोचली. यात एक जण जखमी झाल्याने शहर पोलीस ठाण्यात दहा ते अकरा जणांविरोधात गुन्हा दाखल करण्यात आला आहे. 
उमेर मेहबूब पारवे असे जखमी तरुणाचे नाव आहे. तर निखिल मुर्तडक, श्याम अरगडे, नयन मुर्तडक, सुनील धात्रक, सागर (पूर्ण नाव माहित नाही) यांच्यासह आणखी पाच ते सहा जणांचा आरोपीमध्ये समावेश आहे. शहर पोलीस ठाण्यात या संदर्भात जखमी युवकाच्या वडिलांनी तक्रार दाखल केली आहे.
बुधवारी सायंकाळी फिर्यादीचा मुलगा आणि आरोपींमध्ये बॅग विकण्याच्या कारणावरून वाद झाला होता. फिर्यादीचा मुलगा व त्याचे मित्र रात्री जवळच्याच महेश नागरी पतसंस्थेसमोर गप्पा मारत असताना दुपारच्या भांडणाचा राग मनात धरून तेथे आलेल्या आरोपींनी फिर्यादीच्या मुलास लाथाबुक्क्याने मारहाण करत शिवीगाळ केली. त्यामुळे फिर्यादीचा मुलगा उमेर हा तक्रार देण्यासाठी पोलीस ठाण्यात येत असताना पोलीस ठाण्यासमोरील बाप्ते किराणा दुकानाजवळ आरोपींनी त्याच्यावर हल्ला करत त्याला चाँपरने मारहाण करून गंभीर जखमी केले. अशा आशयाची फिर्याद गुरुवारी महेबूब इब्राहिम पारवे यांनी शहर पोलीस ठाण्यात गुरुवारी दाखल केली आहे.
पारवे यांच्या तक्रारीवरून शहर पोलीस ठाण्यात दहा ते अकरा जणांविरोधात गुन्हा दाखल करण्यात आला असून शहर पोलीस पुढील तपास करत आहेत.
पालिका आणि पोलिसांच्या कृपेने शहरात रस्त्यावर अतिक्रमण करून व्यवसाय करणाऱ्या अतिक्रमणधारकांचा प्रश्न दिवसेंदिवस गंभीर बनत आहे. यातूनच आता वाहतुकीला अडथळा आणत रस्त्यावर दुकाने थाटून व्यवसाय करणाऱ्या व्यावसायिकांमध्ये हाणामाऱ्याचे प्रकार घडू लागले आहेत. त्यामुळे रस्त्यावरील अतिक्रमणे हटविण्यासाठी पालिका प्रशासन नेमके एखाद्याचा जीव गेल्यावर जागी होणार का? असा प्रश्न नागरिक उपस्थित करत आहे.
