बेरोजगारांना नोकरीची खोटी नियुक्तीपत्रे तयार करणारा छायाचित्रकार पोलिसांच्या जाळ्यात; ५५ लाखाची माया गोळा करणारे चौघे शिर्डी पोलिसांनी पकडले

महाराष्ट्र संवाद न्यूज नेटवर्क
शिर्डीच्या आंतरराष्ट्रीय विमानतळावर मोठ्या पगाराची नोकरी देण्याचे आमिष दाखवत अकरा बेरोजगारांना प्रत्येकी पाच लाख रुपये गंडा घालणारी टोळी शिर्डी पोलिसांनी पकडली आहे. यात एका छायाचित्रकाराचा देखील समावेश आहे.
शिर्डी विमानतळावर नोकरी देण्याचे आमिष दाखवून बेरोजगारांना बनावट नियुक्तीपत्र देऊन फसवणूक केल्याचा प्रकार समोर आला आहे. अकरा बेरोजगारांकडून आरोपींनी आत्तापर्यंत पंचावन्न लाख रुपये उकळले असल्याचे समोर आले आहे. १४ सप्टेंबरला बीड येथील चंद्रकांत विठ्ठलराव जाधवराव यांनी यासंदर्भात शिर्डी पोलीस ठाण्यात तक्रार दाखल केली होती. यात जाधवराव यांनी म्हटले की माझ्या मुलाचं एकूण अकरा मुलांकडून प्रत्येकी पाच लाख रुपये घेऊन शिर्डी विमानतळावर मोठ्या पगाराची नोकरी लावून देण्याचे आश्वासन दिले होते. मात्र बराच काळ प्रतीक्षा केल्यानंतर देखील आरोपींनी नोकरी मिळवून न दिल्याने त्यांच्याकडे पाठपुरावा केला असता आरोपींनी नोकरीची नियुक्तीपत्रे दिली. याबाबत शिर्डी विमानतळावर गेल्यानंतर आपली फसवणूक झाली असल्याचे या मुलांच्या लक्षात आले.
त्यानंतर जाधवराव यांनी शिर्डी पोलीस ठाण्यात या संदर्भात तक्रार दिली होती. सहाय्यक पोलीस निरीक्षक योगिता कोकाटे यांनी यासंदर्भात बारकाईने तपास करत निफाडमधील एका आरोपीसह सिन्नरमधील दोघांना ताब्यात घेत त्यांना अटक केली होती. शिर्डी पोलिसांनी गोकुळ राजाराम कांदे (वय ३२, रा. तामसवाडी ता. निफाड जि. नाशिक), गोकुळ ठकाजी गोसावी वय ३१, विलास रामचंद्र गोसावी वय ३५, दोघे रा. मलढोण, ता. सिन्नर जि. नाशिक यांना अटक केल्यानंतर पोलीस कोठडी दरम्यान त्यांनी ही नियुक्तीपत्रे शिर्डी जवळील पोहेगाव येथील अनिल उत्तम शेजवळ या छायाचित्रकाराकडून तयार करून घेतले असल्याचे सांगितले होते.
त्यामुळे पोलिसांनी अनिल शेजवळ याला देखील या गुन्ह्यात अटक केली असून अटकेतील आरोपींची संख्या चारवर गेली आहे. राहता न्यायालयाने त्याला तीन दिवस पोलीस कोठडी सुनावली असल्याची माहिती पोलिसांनी दिली. यासंदर्भात शिर्डी पोलीस पुढील तपास करत आहेत.