महाराष्ट्र संवाद न्यूज
नागपूर :
केंद्रीय मंत्री नितीन गडकरी यांच्या नावाने फेक पोस्ट केल्याप्रकरणी ठाकरे गटाचा आर्णी तालुका अध्यक्ष प्रवीण देशमुख याला नागपूर सायबर सेल पोलिसांनी ताब्यात घेत चौकशीनंतर त्याला सोडण्यात आले.
कसबा निवडणुकीनंतर देशमुख याने नितीन गडकरी यांच्या नावाने फेक मॅसेज व्हायरल केला होता. केंद्रीय मंत्री नितीन गडकरी यांच्या कार्यालयाच्या तक्रारीनंतर पोलिसांनी ही कारवाई केली आहे. मिळालेल्या माहितीनुसार, मंत्री नितीन गडकरी यांच्या नावे फेक पोस्ट केल्याप्रकरणी पोलिसांनी ही कारवाई केली आहे. आरोपी हा ठाकरे गटाचा आर्णी तालुका अध्यक्ष असून प्रविण देशमुख असे त्याचे नाव आहे. आरोपी प्रवीण देशमुख नागपूर सायबर सेलच्या ताब्यात होता.
नागपूर पोलिसांच्या सायबर सेलने प्रवीण देशमुखची चार तास चौकशी केली. चौकशीनंतर त्याला सूचनापत्र देऊन सोडण्यात आलं आहे.
काय आहे प्रकरण?
पुण्यातील कसबापेठ विधानसभा मतदारसंघाच्या पोटनिवडणुकीच्या निकालावरून केंद्रीय मंत्री नितीन गडकरी यांच्या नावाने फेक पोस्ट व्हायरल करण्यात आली होती. या फेक पोस्टमध्ये नितीन गडकरी यांच्याकडून राज्यातील भाजप नेत्यांना कानपिचक्या देण्यात आल्या होत्या. पण ही पोस्ट फेक (खोटी) असल्याचे गडकरी यांच्या कार्यालयाकडून स्पष्ट करण्यात आले होते. तसेच याप्रकरणी गडकरी यांच्या कार्यालयाकडून नागपूर पोलिसांत तक्रार दाखल करण्यात आली होती.
दरम्यान, नागपूर पोलिसांकडे याबाबत तक्रार करण्यात आली असून गडकरी यांच्या नावाने अशा प्रकारे खोट्या आणि दिशाभूल करणाऱ्या बातम्या पसरवणाऱ्यांवर कठोर कायदेशीर कारवाई करण्याची विनंती नागपूर पोलिसांना करण्यात आली होती. केंद्रीय मंत्री नितीन गडकरी यांच्या कार्यालयाच्या तक्रारीनंतर नागपूर पोलिसांनी कारवाई केली आहे.
