महाराष्ट्र संवाद न्यूज
अहमदनगर जिल्हा योगासन स्पोर्ट असोसिएशनच्यावतीने येत्या १५ व १६ जुलैला संगमनेरमध्ये जिल्हास्तरीय योगासन स्पर्धेचे आयोजन करण्यात आले आहे. मुला-मुलींच्या सहा गटांमध्ये होणाऱ्या या स्पर्धेच्या चार प्रकारात राज्य पातळीवर जाण्याची संधी स्पर्धकांना मिळणार आहे, अशी माहिती महाराष्ट्र व अहमदनगर जिल्हा योगासन स्पोर्ट असोसिएशनचे अध्यक्ष डॉ. संजय मालपाणी यांनी दिली आहे.
स्पर्धेत सहभागासाठी ऑनलाईन पद्धतीने १३ जुलै पर्यंत नाव नोंदणी करता येणार आहे. योगासनास खेळाचा दर्जा प्राप्त झाल्यानंतर त्याच्या प्रचार-प्रसारासाठी तालुका स्तरापासून राष्ट्रीय पातळीपर्यंत योगासन स्पर्धांचे आयोजन केले जात आहे. नुकत्याच झालेल्या खेलो इंडिया व नॅशनल गेम्स या राष्ट्रीय स्पर्धांमध्ये देखील योगासनांचा समावेश करण्यात आला होता. त्यात महाराष्ट्राने सुवर्ण कामगिरी करतांना पदकांची लयलुट केली.
स्पर्धकांच्या सातत्यपूर्ण यशाने मनोबल उंचावलेल्या राज्य योगासन संघटनेने महाराष्ट्रातील विविध जिल्ह्यात या स्पर्धा आयोजित करण्यास सुरुवात केली असून त्या माध्यमांतून योगामधील प्रतिभावंत खेळाडूंचा शोध घेतला जात आहे. या स्पर्धेत चांगली कामगिरी करणार्या खेळाडूंची राज्य पातळीवरील संघात निवड केली जाणार आहे.
पुढील आठवड्यात शनिवारी (ता.१५) व रविवारी (ता. १६) नाशिक पुणे महामार्गावरील मालपाणी लॉन्स येथे या स्पर्धा पार पडणार आहे. मुला-मुलींच्या स्वतंत्र गटांमध्ये होणाऱ्या या स्पर्धेत ९ ते १४ वयोगटासाठी सब ज्युनिअर, १४ ते १८ वयोगटासाठी ज्युनिअर, १८ ते २८ वयोगटासाठी सीनियर, २८ ते ३५ वयोगटासाठी सीनियर (अ), ३५ ते ४५ वयोगटासाठी सीनियर (ब), ४५ ते ५५ वयोगटासाठी सीनियर (क) अशा सहा गटांमध्ये स्पर्धेची विभागणी करण्यात आली आहे.
त्यासाठी ३१ मार्च २०२३ पर्यंतचे वय गृहीत धरले जाणार आहे. पारंपारिक एकल, कलात्मक एकल व दुहेरी तसेच तालात्मक दुहेरी या योगासनांच्या चार प्रकारात ही स्पर्धा होणार असून स्पर्धकांना दोन स्पर्धा प्रकारात सहभागी होता येईल. विजयी होणार्या खेळाडूंचा संघ राज्यपातळीवर जिल्ह्याचे प्रतिनिधीत्व करणार आहे. तर, राज्य पातळीवरील स्पर्धेत उत्तम कामगिरी करणार्या खेळाडूंना राष्ट्रीय स्पर्धेत स्थान मिळवण्याचीही संधी या स्पर्धेच्या माध्यमातून मिळणार आहे.
पर्धेबाबत अधिक माहितीसाठी उमेश झोटिंग (9823138856) व कुलदीप कागडे (9527320109) यांच्याशी संपर्क साधण्याचे आवाहन करण्यात आले आहे.
