महाराष्ट्र संवाद न्यूज नेटवर्क
आपल्या नावावर तब्बल दोन मोठ्या उलाढालीच्या कंपन्या असल्याचा धक्का बावीस वर्षे वयाच्या एका बेरोजगार तरुणाला जीएसटीच्या आलेल्या 24 लाख 61 हजार रुपयांच्या बिलाच्या नोटीसमुळे बसला आहे.
त्यामुळे धक्का बसलेल्या या तरुणाने थेट पोलीस स्टेशन गाठून आपली व्यथा पोलिसांपुढे मांडली. पोलिसांनी देखील या बेरोजगार तरुणाच्या तक्रारीची शहानिशा करण्यासाठी तपास सुरू केला आहे.
इंडियन एक्सप्रेसने या संदर्भातील वृत्त दिले असून त्यात म्हटले आहे की, उत्तर प्रदेश मधील बुलंद शहरातील रहिवासी असलेल्या देवेंद्र कुमारला 24 लाख 61 हजार रुपयांच्या थकीत जीएसटी बिलाची नोटीस आली. बांधकाम मजूर असलेल्या देवेंद्र कुमारला या नोटीसमुळे चांगलाच धक्का बसला. गेल्या काही महिन्यांपासून बेरोजगार असलेल्या देवेंद्र कुमारच्या नावावर एक कोटी छत्तीस लाख रुपये उलाढाल असणारी कंपनी आहे, असा खुलासा त्याला या नोटीसमधून झाला आहे. या पाठोपाठ त्याला दुसरी आणखी एक नोटीस मिळाली असून त्यात त्याच्या नावावर असलेल्या कंपनीची एक कोटी सोळा लाख रुपयांची उलाढाल असल्याचं नमूद करण्यात आलं आहे. त्यामुळे प्रत्यक्षात बेरोजगार असलेला देवेंद्र कुमार या नोटीसमुळे मात्र तब्बल दोन कंपन्यांचा मालक असल्याचे दिसते.
देवेंद्र कुमारच्या मते दोन वर्षांपूर्वी तो नोएडाच्या पॅकिंग कंपनीत हेल्पर म्हणून काम करत होता. कंपनीच्या कंत्राटदारान त्याचं पॅन आणि आधार कार्ड पगारासाठी घेतलं होतं. त्याच्याच आधारावर त्या कंपनीतील लोकांनी कागदपत्रांचा गैरवापर करून बनावट कंपनी उभी केली असावी, असं देवेंद्र कुमारचे म्हणणं आहे.
कागदपत्राचा गैरवापर केल्याचा संशय देवेंद्र कुमारला असून गरीब असलेला देवेंद्र कुमार हा एका गृहनिर्माण प्रकल्पात मजूर म्हणून काम करत होता. त्याला दिवसाकाठी तीनशे रुपये पगार मिळायचा पण आता ते काम देखील त्याच्याकडे नाही. अशा स्थितीत देवेंद्र कुमार एवढ्या मोठ्या कंपनीचा मालक कसा असू शकतो? असा प्रश्न उपस्थित झाला आहे.
