महाराष्ट्र संवाद न्यूज
संगमनेर – रोटरी क्लबसह विविध संस्थांनी आयोजित केलेला रक्तदान शिबिराला संगमनेरकरांचा मोठा प्रतिसाद लाभला. या शिबिरामध्ये एकाच वेळी 327 रक्तदात्यांनी रक्तदान केले. या रक्तदात्यांना एक लाखाचे अपघाती विमा संरक्षण आणि छत्री भेट देण्यात आली.
रक्ताची वाढती गरज लक्षात घेत रोटरी क्लब, टीएलसी ग्रुप, इनरव्हील क्लब, संगमनेर सहकारी औद्योगिक वसाहत, मॅन्युफॅक्चरर्स असोसिएशन, निमा, आयएमए, आयडीए, आयएचएमए आदी संस्थांनी शुक्रवारी (7 जुलै) आयोजित केलेल्या या शिबिराचे उद्घाटन एकविरा फाउंडेशनच्या अध्यक्ष कॅन्सर तज्ञ डॉ. जयश्री थोरात यांच्या हस्ते औद्योगिक वसाहतीमध्ये तर जागतिक स्तरावर संगमनेरचे नाव उंचावणाऱ्या सायकलपट्टू प्रणिता सोमन हिच्या हस्ते रोटरी नेत्र रुग्णालयात करण्यात आले. रक्तदात्यांमध्ये महिलांचाही मोठ्या संख्येने समावेश होता. संगमनेर औद्योगिक वसाहत, रोटरी नेत्र रुग्णालय आणि वर्मा आर्ट्स अशा तीन ठिकाणी एकाच वेळी हे शिबिर घेण्यात आले. अर्पण ब्लड बँक व आधार ब्लड बँक यांनी या प्रकल्पासाठी मदत केली.
रो. रवींद्र पवार यांच्यातर्फे रक्तदात्यांचा एक लाख रुपयांचा अपघाती विमा उतरविण्यात आला तसेच टीएलसी मार्फत पावसाळी छत्री भेट देण्यात आली. रक्तदानाबद्दल समाजात दिवसेंदिवस जागरुकता वाढत आहे. रक्तपेढ्या व विविध हॉस्पिटल यांच्याकडून वारंवार नागरिकांना रक्तदान करण्यासाठी आवाहन करण्यात येत आहे. रक्तदानामुळे लोकांचे प्राण वाचतातच, याशिवाय रक्तदात्यासही त्याचे आरोग्य सदृढ राहण्याचे फायदे मिळतात.
जागतिक आरोग्य संघटनेच्या मते, रक्त संक्रमणामुळे बर्‍याच लोकांचे व रुग्णांचे प्राण वाचू शकतात, परंतु बहुतेक वेळा रक्ताची गरज असलेल्या रुग्णांना योग्य रक्तगट मिळणे तसेच रक्त सहजपणे पडताळून देणे कठीण होते. यामुळे रक्तदान शिबीरांचे वेळोवेळी आयोजन करणे खुप महत्त्वाचे ठरते.
शिबिर यशस्वीतेसाठी रोटरी क्लब अध्यक्ष आनंद हासे, सेक्रेटरी मधुसुदन करवा, औद्योगिक वसाहतीचे चेअरमन के. के. थोरात, व्हा. चेअरमन राहुल गडगे, इनरव्हीलच्या अध्यक्षा सुनिता गाडे, सेक्रेटरी शिल्पा नावंदर, प्रकल्प प्रमुख डॉ. प्रमोद राजुस्कर, मंजु मणियार, प्रकल्प समन्वयक उद्योजक नितीन हासे, कपिल चांडक, संदीप फटांगरे आदींनी प्रयत्न केले.
