दंडकारण्य अभियानाचा शुभारंभ रविवारी पिंपळगाव कोंझिरामधून… आमदार थोरात, माजी आमदार डॉ. तांबे यांची उपस्थिती; प्रकल्प प्रमुख सौ दुर्गाताई तांबे यांची माहिती

महाराष्ट्र संवाद न्यूज
संगमनेर – पर्यावरण संवर्धनाची लोकचळवळ बनलेल्या दंडकारण्य अभियानाच्या 18 व्या वर्षाचा शुभारंभ रविवारी (दिनांक 23 जुलै) सकाळी 9 वाजता पिंपळगाव कोंझिंरा येथील कनकेश्वर डोंगर येथे काँग्रेस विधिमंडळ पक्षाचे नेते, आमदार बाळासाहेब थोरात व अभियानाचे मुख्य प्रवर्तक माजी आमदार डॉ. सुधीर तांबे यांच्या उपस्थितीत होणार असल्याची माहिती प्रकल्प प्रमुख दुर्गाताई तांबे यांनी दिली.
तांबे म्हणाल्या, सहकार महर्षी भाऊसाहेब थोरात यांच्या संकल्पनेतून व जयहिंद लोक चळवळीच्या माध्यमातून सुरू झालेल्या दंडकारण्य अभियानाचे हे 18 वे वर्षे आहे. आमदार बाळासाहेब थोरात व माजी आमदार डॉ. सुधीर तांबे यांच्या मार्गदर्शनाखाली तालुक्यातील उघड्या बोडक्या डोंगरांवरती बिजारोपण, वृक्षारोपण करण्यात आले आहे.
यातून तालुक्यात हिरवाई निर्माण झाली असून वृक्ष संवर्धन संस्कृती वाढली आहे. या अभियानाची आंतरराष्ट्रीय पातळीवर युनोनेदेखील दखल घेतली असून अभियानाच्या या यशस्वीतेमध्ये तालुक्यातील अबाल वृद्धांसह विद्यार्थ्यांचा मोठा सहभाग राहिला आहे.
सहकार महर्षी भाऊसाहेब थोरात अमृतवाहिनी बँकेच्या पुढाकारातून यावर्षी पिंपळगाव कोंझिरा येथील कनकेश्वर डोंगरावर शुभारंभाचा कार्यक्रम काँग्रेस विधिमंडळ पक्षाचे नेते आमदार बाळासाहेब थोरात, माजी आमदार डॉ. सुधीर तांबे, आमदार सत्यजित तांबे, बाजीराव खेमनर, माधवराव कानवडे, रणजीतसिंह देशमुख, बाबा ओहोळ, डॉ. जयश्रीताई थोरात, शंकर खेमनर, इंद्रजीत थोरात, संपत डोंगरे, सुधाकर जोशी, रामहरी कातोरे, हौशीराम सोनवणे, राजेंद्र गुंजाळ, मिलिंद कानवडे, सोमेश्वर दिवटे, अर्चना बालोडे, प्रा. बाबा खरात, विष्णुपंत रहाटाळ, ॲड. मधुकर गुंजाळ, ॲड. नानासाहेब शिंदे आदींसह अमृत उद्योग समूहातील विविध संस्थांचे पदाधिकारी व मान्यवर उपस्थित राहणार आहेत.
शुभारंभ कार्यक्रमासाठी पिंपळगाव कोंझिरासह परिसरातील नागरिकांनी मोठ्या संख्येने उपस्थित राहावे, असे आवाहन दंडकारण्य अभियान समिती, जयहिंद लोकचळवळ, पिंपळगाव कोंझिरा ग्रामस्थ व अमृतवाहिनी बँकेच्या वतीने करण्यात आले.