महाराष्ट्र संवाद न्यूज
अमरनाथवरुन परतणारी भाविकांची बस आणि नागपूरवरुन नाशिकला जाणाऱ्या खासगी बसची समोरासमोर धडक झाली. या धडकेत दोन्ही बसचा चुराडा झाला. या अपघातात 6 प्रवाशांचा मृत्यू झाला असून तब्बल 25 प्रवासी जखमी झाले आहेत.
शनिवारी पहाटे तीन वाजण्याच्या सुमारास मुंबई-नागपूर महामार्गावर मलकापूर हायवे क्रमांक सहावर लक्ष्मी नगर जवळील उड्डाण पुलावर घडली. या दोन्ही खासगी प्रवासी बस असल्याची प्राथमिक माहिती सूत्रांनी दिली आहे.
भीषण अपघातात सहा प्रवासी ठार : हिंगोलीच्या दिशेने जाणारी एम एच 08. 9458 ही ट्रॅव्हल्स बस अमरनाथ येथून तीर्थयात्रा करून परत येत होती. या ट्रॅव्हल्स बसमध्ये 35 ते 40 भाविक होते. तर नागपूरवरून नाशिकच्या दिशेने जाणाऱ्या गाडी क्रमांक एम एच 27 बी एक्स 4466 या ट्रॅव्हल्स बसमध्ये 25 ते 30 प्रवाशी होते. समोरासमोर झालेल्या अपघातात या दोन्ही वाहनांचा अक्षरशः चुराडा झाला. या भीषण अपघातात सहा प्रवाशांचा जागीच मृत्यू झाला आहे. तर दोन्ही ट्रॅव्हल्समधील ते 22 प्रवासी जखमी आहे.
पोलीस घटनास्थळी : या घटनेची माहिती मिळताच पोलिसांनी घटनास्थळी जाऊन मदत कार्य केले. काही जखमींची प्रकृती चिंताजनक असल्याने त्यांना बुलढाणा येथे हलवण्यात आल्याची प्राथमिक माहिती आहे. तर मृतांचा आकडा वाढण्याची शक्यता आहे. यावेळी रस्त्यावर ट्रॅफिक जाम झाल्याने वाहनाच्या रांगा लागल्या होत्या. अमरनाथवरुन आलेल्या या भाविकांचा घटनास्थळावर प्रचंड आक्रोश दिसून आला.
