महाराष्ट्र संवाद न्यूज
शिर्डी – “लोकाभिमुख कामांचा करूनी निपटारा, चला करूया महसूल सप्ताह साजरा” या ब्रीदवाक्याने महसूल सप्ताहाचा शुभारंभ केला जाणार असून महसूल खात्याशी संबंधित सामान्य नागरिकांनी केलेल्या तक्रारी आणि अर्जासंदर्भात काल मर्यादेत निपटारा व्हावा, जनतेला दर्जेदार व चांगली सेवा उपलब्ध व्हावी यासाठी 1ऑगस्टच्या महसूल दिनापासून राज्यात महसूल सप्ताहाचे आयोजन केले जाणार असल्याची माहिती राज्याचे महसूल तथा जिल्ह्याचे पालकमंत्री राधाकृष्ण विखे पाटील यांनी दिली.
दूरदृश्य प्रणालीच्या माध्यमातून बैठक: दूरदृश्य प्रणालीच्या माध्यमातून महसूल सप्ताहाच्या नियोजनासाठी मंत्री विखे पाटील यांनी घेतलेल्या बैठकीला राज्यातील सर्व विभागीय आयुक्त, जिल्हाधिकारी, अपर जिल्हाधिकारी, नोंदणी महानिरीक्षक, जमाबंदी आयुक्त, प्रांताधिकारी उपस्थित होते. बैठकीत त्यांनी नियोजनाचा आढावा घेतला.
विखे म्हणाले, सप्ताहाचे आयोजन केवळ शासकीय स्वरूपाचे न करता या व्यापक अभियानातून अधिकारी कर्मचाऱ्यांचा नागरिकांशी संवाद कसा होईल यादृष्टीने प्रयत्न करावा. विशेष मोहिमेद्वारे नागरिकांचे प्रश्न सोडवितांना गतिमान व लोकाभिमुख प्रशासन करण्याचा संकल्प आहे. अभियानात प्रशासकीय अधिकारी, लोकप्रतिनिधी आणि सामान्य नागरिकांनी सहभागी होऊन अभियान यशस्वी करण्याचे आवाहन त्यांनी केले.
काय कराल: यादरम्यान कार्यालयीन स्वच्छतेपासून विभागातील अधिकारी कर्मचाऱ्यांचा सहभाग असलेले सांस्कृतिक, साहित्यिक आणि सेवाभावी उपक्रम आयोजित करण्याचे आवाहन केले. महसूल विभागाने वर्षभर केलेल्या लोकाभिमुख कामकाजाचा आढावा जनतेसमोर ठेवण्यासाठी एक ऑगस्टला राज्यात महसूल दिन साजरा केला जातो. यावर्षी मात्र या अभियानाला व्यापक स्वरूप देण्याचा निर्णय घेण्यात आल्याचे विखे म्हणाले.
अभियानाच्या सात दिवसांमध्ये सामान्य नागरिकांच्या तक्रारी त्यांच्या अर्जावर काल मर्यादेत निपटारा करून अधिक चांगली दर्जेदार सेवा देण्याचा प्रयत्न या माध्यमातून केला जाणार आहे. कार्यालय आणि परिसर स्वच्छता मोहीम, राईट टू सर्विस कायद्याची अंमलबजावणी, सिक्स बंडल रेकॉर्ड उपक्रम, कार्यालयीन सेवेची कार्यप्रणाली या सप्ताहानिमित्ताने तयार करण्यात यावी. तसेच वरिष्ठ अधिकाऱ्यांनी एक दिवस दुर्गम भागात मुक्काम करून गावाचे प्रश्न जाणून घ्यावे. राज्यात प्रथमच सप्ताहाच्या निमित्ताने संपूर्ण प्रशासन लोकांपर्यंत घेऊन जाण्याचा प्रयत्न असल्याचे ते म्हणाले.
असे आहे सप्ताहाचे नियोजन: 1 ऑगस्टला महसूल सप्ताहाचा शुभारंभ मुख्यमंत्री एकनाथ शिंदे आणि उपमुख्यमंत्री देवेंद्र फडणवीस व अजित पवार यांच्या उपस्थितीत करण्यात येणार आहे. 2 ऑगस्टला ‘युवा संवादा’च्या माध्यमातून महसूल विभाग महाविद्यालयांमध्ये जाऊन विद्यार्थ्यांच्या समस्या जाणून घेत मार्गदर्शन करेल. 3 ऑगस्टला ‘एक हात मदतीचा’ या उपक्रमातून सामान्य माणसाचे गाव पातळीवर महसूलशी संबंधित प्रश्न जाणून घेतले जातील. 5 ऑगस्ट ‘सैनिक हो तुमच्यासाठी’ या उपक्रमांतर्गत माजी सैनिक तसेच त्यांच्या कुटुंबाचे प्रश्न जाणून घेतले जातील. महसूल विभागातील निवृत्त अधिकारी-कर्मचारी आणि त्यांच्या कुटुंबीयांचा सन्मान केला जाणार आहे.
अधिकारी-कर्मचाऱ्यांच्या गुणवंत पाल्यांचा सत्कार तसेच विभागातील अधिकारी, कर्मचाऱ्यातील कवी, साहित्यिक यांच्या साहित्यिक सांस्कृतिक कार्यक्रमाचे आयोजन करण्यासंदर्भात महसूल मंत्र्यांनी सूचना दिल्या.
