रूफटॉप सोलर उभारणी करणारा राज्यातील पहिला कारखाना
महाराष्ट्र संवाद न्यूज
संगमनेर – सहकार महर्षी भाऊसाहेब थोरात सहकारी साखर कारखान्याने छतावरील सोलर सिस्टीम (रूफटॉप) प्रकल्प उभारला असून या प्रकल्पाद्वारे दररोज ७५० किलोवॅट वीज निर्मिती होणार आहे. थोरात कारखान्याने अशा प्रकारचा राज्यातील पहिला प्रकल्प कार्यान्वित करून इतरांसाठी आदर्श निर्माण केला आहे.
काँग्रेस विधिमंडळ पक्षाचे नेते आमदार बाळासाहेब थोरात यांच्या नेतृत्वाखाली सुरू असलेला संगमनेर मधील सहकार महर्षी भाऊसाहेब थोरात सहकारी साखर कारखाना नेहमीच आपल्या वेगवेगळ्या उपक्रमामुळे राज्यासाठी प्रयोगशील व दिशादर्शक राहिला आहे.
पुण्यातील बैठकीत कार्यकारी संचालकांचा सत्कार : थोरात कारखान्याने अल्प कालावधीत या प्रकल्पाची उभारणी करत प्रकल्प कार्यान्वित केल्याने पुणे येथे को-जन इंडियाच्या बैठकीत राज्य साखर संघाचे चेअरमन व को-जन इंडियाचे उपाध्यक्ष डॉ. जयप्रकाश दांडेगावकर यांच्या हस्ते कारखान्याचे कार्यकारी संचालक जगन्नाथ घुगरकर यांचा सत्कार करण्यात आला.
कारखान्याने उभारलेल्या सौर ऊर्जेवरील दिशादर्शक रूफ टॉप सोलर प्रकल्पाबद्दल कारखान्याच्या धुरीनांचे को-जन इंडियाचे संचालक मंडळाच्या बैठकीत कौतुक करण्यात आले.
अशी राहिली कारखान्याची वाटचाल : सहकार महर्षी भाऊसाहेब थोरात यांच्या आदर्श तत्त्वांवर वाटचाल करणाऱ्या थोरात सहकारी साखर कारखान्याने काँग्रेस विधिमंडळ पक्षनेते आमदार बाळासाहेब थोरात यांच्या मार्गदर्शनाखाली शेतकरी, सभासद, ऊस उत्पादक, कामगार यांचे हित जपताना ऊस उत्पादक शेतकऱ्यांनाही सातत्याने विक्रमी भाव दिला आहे. नव्याने उभारलेल्या 5500 मे. टन क्षमता व 30 मेगावॅट वीज निर्मिती प्रकल्प हा यशस्वीपणे कार्यरत असून तोदेखील साखर कारखानदारीत इतरांसाठी दिशादर्शक ठरला आहे.
असे आहेत नव्या प्रकल्पाचे फायदे : कारखान्याने छतावरील सोलर सिस्टीमद्वारे 750 किलोवॅट वीज निर्मितीचा प्रयोग अवघ्या तीन महिन्याच्या कालावधीत पूर्ण करून नुकताच कार्यान्वित केला. या सोलर सिस्टीममधून एका तासात 750 युनिट म्हणजे सलग दिवसभरातील बारा तासात नऊ हजार युनिट वीज तयार होणार आहे. दररोज तयार होणारी ही विज कारखाना स्वतः वापरणार असून कारखान्याच्या ऑफ सीजन काळात ही वीज ऊर्जा महामंडळाला विकली जाणार आहे. त्यामुळे प्रकल्पाच्या उभारणीचा 2 कोटी 90 लाख रुपये खर्च अवघ्या अडीच ते तीन वर्षात वसूल होणार आहे.
यांनी केले अभिनंदन : कारखान्याने उभारलेल्या या यशस्वी प्रकल्पाबद्दल, को-जनचे अध्यक्ष खासदार शरद पवार, काँग्रेस विधिमंडळ पक्षाचे नेते आमदार बाळासाहेब थोरात, माजी आमदार डॉ. सुधीर तांबे, आमदार सत्यजित तांबे, माजी नगराध्यक्ष दुर्गाताई तांबे, जिल्हा बँकेचे उपाध्यक्ष माधव कानवडे, ज्येष्ठ नेते बाजीराव खेमनर, संगमनेर तालुका दूध उत्पादक संघाचे अध्यक्ष रणजीतसिंह देशमुख, कारखान्याचे संचालक इंद्रजीत थोरात, एकविरा फाउंडेशनच्या प्रमुख कॅन्सरतज्ञ डॉ.जयश्री थोरात, संपत डोंगरे, सुधाकर जोशी, शंकरराव खेमनर, रामहरी कातोरे आदींनी अभिनंदन केले आहे.
