महाराष्ट्र संवाद न्यूज
संगमनेर – बुधवारी (दिनांक 9 ऑगस्ट) सकाळी क्रांती दिनानिमित्त संगमनेरमध्ये काँग्रेस पक्षाच्यावतीने पदयात्रा, भव्य रॅली काढण्यात येणार असून त्यानंतर यशोधन कार्यालयाच्या प्रांगणात भव्य आदिवासी जनजागृती मेळावा आयोजित करण्यात आला आहे.
यांनी दिली माहिती : यासंदर्भात आदिवासी सेवक प्रा. बाबा खरात, बाळकृष्ण गांडाळ व काँग्रेसचे शहराध्यक्ष सोमेश्वर दिवटे यांनी माहिती दिली असून यावेळी काँग्रेस विधिमंडळ पक्षनेते आमदार बाळासाहेब थोरात, माजी आमदार डॉ. सुधीर तांबे, नगराध्यक्ष दुर्गाताई तांबे, कॅन्सर तज्ञ डॉ. जयश्रीताई थोरात उपस्थित राहणार आहे.
असे आहे नियोजन : आमदार बाळासाहेब थोरात, माजी आमदार डॉ. सुधीर तांबे यांच्यासह मान्यवरांच्या उपस्थितीत बुधवारी क्रांती दिनानिमित्त सकाळी 8 वाजता नेहरू चौक येथे अभिवादन करून ही पदयात्रा गांधी चौक – स्वातंत्र्य चौक – मार्गे छत्रपती शिवाजी महाराज पुतळा- बस स्थानक ते यशोधन कार्यालय अशी रॅली होईल.
यशोधन प्रांगणात मेळावा : यानंतर संगमनेर तालुका व पंचक्रोशीतील आदिवासी, हिंदू महादेव कोळी, ठाकर, भिल्ल व इतर अनुसूचित जाती जमाती समाज बांधवांचा भव्य मेळावा यशोधन कार्यालयाच्या प्रांगणात होणार आहे. याप्रसंगी आदिवासी आश्रम शाळा, आदिवासी वसतीगृहातील विद्यार्थी, लेझीम पथक, आदिवासी गीते, आदिवासी लोककला, वेशभूषा, सांस्कृतिक सादर करून आदिवासी सांस्कृतिक लोककलांचा जागरसुद्धा होणार आहे.
आदिवासींचे विविध प्रश्न प्रलंबित असून या प्रश्नांच्या मागणीसाठी एकत्रित आवाज उठवण्याकरता सर्वांनी या जनजागृती मेळाव्यासाठी मोठ्या संख्येने उपस्थित राहावे असे आवाहन संगमनेर तालुका हिंदू महादेव कोळी, ठाकर, भिल्ल समाज संघटना व पदाधिकाऱ्यांनी केले आहे.
